Pope Leo XIV in Cardinal Ruini cu “fimnak thawn a khat ih tuanvo a tuanfeltu Tuukhal pakhat a si” tiah sunloih in hngamhnget.(June 18, 2026)
Pope Leo in Cardinal Ruini ih Pawlpi par ih rinum zet in a riantuannak nunram le a hoha nak pawl kha sunloih in upatnak a pe ih a mah cu “fimnak thawn a khat ih tuanvo tha ten a tuantu Tuukhal tha a si” tiah a rak lawm.
Pope in Cardinal Ruini cu fimthiamnak thawn a khat ih tuanvo a neh tu tuukhal a si tiah a langter ih Pawlpi hrangah “a niambik mi tuanvo ihsin a tumbik mi tuanvo tiang” rin um zet in a rak tuantu a si thu a rak lawm. Cuihleiah a mah cu Pathian ih miphun le bishop pawl lam hmuhtu a si ih “a thupi ih duhnungza tik cu caan pawl ah a hman mi tumram a hmuh theitu a sithu khal Pope in mangsal in a rak sim.
Tlawngkai nili ni zanlam ah St.Peter tualrawn ih tuah mi vuinak caanserh ah Pope Leo in June 16 ni ah kum 95 a kim ah nunnak cemtu Cardinal Camillo Ruini cu a rak sunloih.
Nunnak cemtu Cardinal Camillo Ruini cu 1991 in 2008 tiang Rome diocese ah Vicar General le Archbasilica of Saint John Lateran ih Archpriest dinhmun in rian a tuan ih 1991 in 2007 tian Italian Episcopal Conference ih President dinhmun in a rak tuan. Amah vuinak caanserh ah Pope in Cardinal Ruini cu Pawlpi hrangah kumtampi rian a rak tuan lai ah a rak tuah mi tumtahnak pawl, hmuhnak pawl le hram a rak thawhnak pawl ruangah a lungawi thu a rak sim.
Cui ni Missa raithawinak ih siar mi pawl, Khrih le Pawlpi parih a rinumnak thinlung a langter tiah Pope Leo in a rak sim ih Cardinal Camillo Ruini cu cui rinumnak ih lungawiza zohthim tlak pakhat a sithu a rak sim. A hmaisa cathianghlim siarnak ah Saint Paul ih ngan mi sungin a si ih Pathian ih duhdawtnak in ziang khal in in then thei lo ding ti thu a rak sim. Pope in hi Cathianghlim cu nunnak cemtu Cardinal Ruini ih nunram khal a rak thangphawk thu a sim.
Pope Leo XIV in nunnak cemtu Cardinal Camillo Ruini cu santhar tikcu caan ih mithianghlim hminthangzet pawl a si mi Pope Paul VI le Pope John Paul II pawl thawn riantuan theinak a rak neitu a si a tiah a sim. Pope ih simnak ah Cardinal Ruini cu a hleice in St. John Paul II hnen in tampi a rak zir ih a mai Pawlpi ih hmuh daan, zumnak le Pawlpi parih a rinumnak pawl kha thuk zet in a rak cohlang tiah a sim.
Pope in pehbet in Cardinal Camillo Ruini ih thiamhleice mi thil ti theinak pawl zate cu a mai motto a si mi “Thudik in a lo luat ter ding” ti mi a thuk zet mi tongfang a rak hmuh thei thu a sim. Pope Leo ih simnak ah hi Pathian tongkam cu tuisan minung pawl ih thinlung buainak tetti khannak le humhimnak pawl kha thupi bik in a rak ret ih hi mi in tuisan Pawlpi le zumtu pawl hrang khal ah lamhmuh tu tleunak pakhat a si lai thu Pope in hminsin in a rak sim.
Funeral service a cemnak ah Pope in nunnak cemtu Cardinal Camillo Ruini hnen “cem thei lo mi Pathian ih remdaihnak laksawng” kha pe dingin thla a rak cam. Cuihlei ah Cardinal Ruini ih Pawlpi ih rian a rak tuannak kum pawl lawng silo in kum a hungtam ih harhdamnak pawl a that nawn lo caan pawl khal ah “rinum zet in duhsaknak tumpi thawn a bawmtu ih a tuamhlawmtu pawl” hnen khal a lung a awi thu a rak sim.
Missa a cemnak ah Latin ttongin thla a cam hnuah Pope ih Cardinal ih ruak parah thianghlim ti a theh ih rimhmui urnak thawn upatnak a rak pe a si. Hi mi thuthang cu Vatican thuthangin a tawizawng in kan ngan mi asi.
