Spain ram Tenerife ih thu a simnak ah Pope Leo XIV in milai thawn sumtuahnak kha nasa takin soisel.( June 13, 2026)
Tenerife cu Pope Leo XIV ih Vatican ih a tlun hlan netabik a cawlnak hmun a si ih Las Raices Reception Center ah umnak hmun thawn in a umtu pawl le riantuan tu pawl a rak tonnak ah cui center cu 2021 kum ah on thok hnuah mivai pawl hmunhnget in a um tu 54000 luan an cohlang ih nitin riantuan tu minung 600 hrawngin an hnatuan an tuan theu.
Cuihmunah Pope Leo XIV in center ih um mi nupi pakhat tel in tettikhannak an thusimnak pawl a rak ngai sak. Mivai pawl lakih nu pakhat in kan mah pawl cu farah harsatnak pawl, tuahmawhnak, ralbuainak, hmuhsuamnak le zianghman ti theinak kan neih lonak ruangah mai ram tan in kan ratnak a si. Zohman in mai duhnak vekin mai suahnak ram, innsungsang le kan hramtohnak tiangin kan tanta tinak a si lo.
Pope Leo XIV in nupi nu ih tuarnak pawl tetti khan nak ttongkam pawl ruangah a lungawi thu a sim ih an thawn (An vah) nak lamtluanah an ton mi harsatnak pawl phah tlang theinak thazaang le an tuar theinak ruang khal ah a rak lawm. Cuihleiah Las Raices (The Roots) ah tuah mi hnatuannak pawl hrangah France ttongin a sim mi a thucahnak ah a lungawi thu arak sim.
Cuihnuah Pope Leo XIV cu netabik tonawknak hmun Plaza del Cristo ah a feh ih mivai pawl ih tetti khannak ttong pawl a ngai hrih. Cumi sungah Senegal ram in Mbacke ti mi khal a tel ih a mah cu Canary Islands ih a thlennak kum khat le hrek hrawng a siih a mai a thawnnak lamtluan le a ton mi hmuhtonnak pawl a rak sim.
Senegal ram in a vaitu Mkacke in Canary Tikulh cu suahnak ram a si lo hman sehla a um thei thu a rak sim. Hi hmunram ah pakhat khat ih dilnak um lo in pek a si tikah tihphannak a cem ih ruahsannak pawl ka hmu a si tiah a rak sim. Curuangah tuini keimai thubawhcat nak cu a menmen te asi ka ngah mi hmuah hrangah pekawk ka tuah duh” tiah a rak sim.
Acemnak ah Pope in milai thawn sumtuahnakah a tel tu pawl le cu mi in a hlawknak a la tu pawl nasa zet in a rak soisel.
Pope LeoXIV in “Thihnak lam ah mi a thlen ter thei mi a tawlrel tu pawl, milai kha thilri vek in a zuar ih a lei tu pawl, cu mi thawn pehpar in cazin pawl a kilkhawitu pawl, hnatuan tu pawl par ih a hlawknak a miat latu pawl, nunau pawl hringhro tu pawl, innsungsang pawl a bum ih a zawl tu pawl le midang pawlih harsatnak kha sumdawnnak ah a hmangtu pawl, hi hnatuannak pawl kha cawl thlang uh si. Hi mi tuahtu pawl an thinlung thleng thei hram hai seh” tiah forhfial in a rak sim. A Tuukhal khual tlawnnak a cemnak zawngah Tenerife ih Peru miphun pawl in Pope Leo XIV kha an sunloihnak ah “This Is My Land” ti hla thawn an rak sunloih. Pope Leo XIV cu American ram mi a si ih hleiah Peru ram mi khal a si. Hi mi thutang Rome report in kan ngan mi a si.
