Pope Leo XIV ih May thla hrang thlacam tumtah mi cu “mitin in rawl ei ding an ngah theinak dingah” tiah a si.(April 30, 2026)
Pope Leo in May thla sungah leitlun hmuntin ih Catholic zumtu pawl hnen mitin in le ei an ngah theinak ding hrang thlacam dingah a rak sawm. Amah in Tlawngkai nili ni ah thlatin suah mi “Pray with the Pope” Video kha a rak suah ih cu mi video cu Pope’s Worldwide Prayer Network in timtuah in a suah a si.
Pope Leo in a mai thlacamnak ah leitlun ih mitampi in rawl ei ding nei lo in harsatnak an tonnak parah a riahsiat thu a rak lang ter. Pope in mihrek khat ih cabuai parah in le ei ding kha cemcawk lo in a siat ral mi tampi a um thu a rak langter ih “in le ei hrangah lungawi thu sim dingah a menmen ten ei thiam dingah, lungawi ten zem in hlawm thiam dingah le leilungih a suak mi thil pawl kha mitin hrangih pek mi Pathian ih laksawng a si ti ih kilhim thiam dingah” tiah thla a rak cam.
Cuihleiah Jesuh Khrih in “mai zawnlawng a ruat mi in le ei daan kha khat le khat a bawm aw mi nunphung ah thleng hram seh” tin khal thla a rak cam.
Pope in nunphung kiangkap ah Theih kauhnak zirhnak cangvaihnak pawl, in le khawlnak Bank pawl le a thlaitluangih tuanvo a nei mi umtu daan pawl kha thatho ten tuah dingah khal a rak forhfial.
Pope Leo XIV in a thlacamnak ah “leitlun mi pawl ih nunnak hrangah phel mi Sang vek a si mi na duhzet mi na fapa Jesuh Khrih kha kan hnen ah in pe tu a nung Pathian, kan mah pawl hnenah thu dik duhnak thinlung le khat le khat lungrualnak kha a duhzet mi thinlung in pe aw” tiah a rak dil.
Anetnak khal ah “mi pakhat tal a tel lo mi rawleinak cabuai in hrial ter awla, na thlarau thianghlim in Sang cu in ei ding men lawngah hmu lo in khat le khat pehtlaihnak thawn ngaihsaknak ih hminsinnakah hmu thei dingah in zirh hram aw” Amen tiah thlacam nak cu a rak cem ter.
World Food Programme ih 2026 Global Outlook ih an simnak ah tuikum sungah minung 318 million hrawng cu in le ei harsatnak an tong thei ih dinhmun tha lo zet tiang hman a thlen thei thu an lang ter.
Pawlkom pawl khal in Nisuahnak lam a laifannak ih a cang mi ralbuainak ruangah minung 45 million hrawng cu tui kum hrek hrawngah in le ei harsatnak an ton thei thu ralrinnak an rak pe. Hi mi thuthang cu Vatican thuthang in a tawi zawngin kan ngan mi asi.
