Pope Leo in Mongomo ih Missa raithawinak ah Milai zapi ih hal mi cu remdaihnak, dingnak le zawn ruah thiamnak a si tiah sim.(April 22, 2026)
Equatorial Guinea ram ih a khualtlawnnak nihnihnak ah Pope Leo XIV in Mongomo khuapi ih Immaculate Conception Biakinn pi ah Missa raithawinak a rak tuah.
Mipum 7000 hrawng a um mi khuapi cu Gabon ramri in kilometer pakhat hrawng lawng a hlat ih President Teodoro Obiang Nguema Mbasogo ih suahnak khua khal a si. Cuihlei ah 2025 kum ah Africa bawhlung lehpannak pawl (Cup of Africa) hrek khat khal an rak tuah dah.
Pope in thuthangtha a simnak ah kum 170 hlan hrawng ah Equatorial Guinea ah Gospel thuthangtha a rak simtu Missionary pawl mangsal in a sim. Cuihlei ah 1969 kum ah Pope St. John Paul VI ih a rak sim mi Africa fale pawl a tu thok in nan mah rori kha Gospel thuthangtha sim tu Missionary hna, tuan thlang uh” ti mi tongfang khal mangsal in a rak sim.
Cuihnuah Pathian duhdawtnak tetti a si mi Missionary pawl, Puithiam pawl, religious pawl, zumtu mi menmen pawl hnen a lungawi thu a rak sim. “An mai nunram ruangah” tiah a sim ih “Khrih parih an rin umnak ruangah harsatnak pawl kha tih lo in Pathian ram dinnak ah an rak tel” tiah a rak sim.
Pope Leo in Equatorial Guinea mipi pawl kha Khrih thuthlun dingah mah le mah botcat aw in mai kiangkap ih umtu pawl hrangah hnatha tuan dingah tha a rak pe. Hi tivekin thubotcahnak cu thinsaunak a tul, zuamnak a tul, veikhatkhat ah cun teimak a tulnak tampi a um” tiah a rak sim. Asinan hi mi cu kanmah pawl in Khrih ih Pawlpi a sinak thu kha langternak phunkhat a si tiah a rak sim.
Christian pawl cu hremnak pawl lole innsungsang sungah harsatnak pawl tong hman sehla Pathian in a mai ram hrangih thlaici cu a than ter thu kha zum a tul. Curuangah mai kiangkap minung pawl parah Pathian ih duhdawtnak kha hmuh a tul tiah Pope in a rak sim. Cuihleiah Pathian ih duhdawtnak cu a mai hmin a than ih a sunloihtu pawl hnen tha a pe ih a khoh ter asi ti khal in pehbet in arak sim.
Pope Leo in Equatorial Guinea mi pawl lawng silo in minung zate nunram ih kan tep mi “halnak” a si mi ruahsannak thu kha ruat phah in a rak sim. Pope Leo in Equatorial Guinea ram cu leisungsuak thil mankhung thawn thlawsuah ngah tu an sithu mangsal in a sim. Cui leisung thil mankhung pawl ah Tipi thuanthum lam ah Zinan tampi le Gas umnak tampi hleiah laih hrih lo mi leisungsuak thil mankhung a si mi Sui, dimon le uranium pawl khal an um thu a rak sim.
Hi mi thil mankhung pawl Equatorial Guinea mi zaten hrangah thlawsuah ih cang dingah, mipi zate hrangih thansonak, tharthawhsalnak le thlengawknak hrangah hmang a tul”tiah a rak sim.
Pathian in lo bawm hram seh. Nan zaten pakhat ciar ih tuanvo nan neih vekin mitam pi hrang that hnemnak hrang tamdeuh in hna a tuan thei mi minung pawlkom pakhat si thei dingah mai hlawknak sumdawnnak hnak in mitampi hrang ruat in thilti theinak covo nei tu pawl le thilti theinak a nei maltu pawl karlak ih danawknak kha malter thei hram uh” tiah a rak sim.
Anetnakah Pope Leo XIV in Equatorial Guinea ih Christian pawl hnen nan ram ih hmailam kha nan kut sungah la in Gospel thuthangtha than in nan ram hrangah ruahsannak tampi thawn hmailam din dingah a rak forhfial. Hi thuthang cu Vatican thuthang in a tawizawngin kan ngan mi asi.
