Pope Leo in Christian pawl cu Pathian ih huham hmang in zohnuam zet mi sualsawm nak kha hnong thiam ding in le Pathian ih uknak ram cu thinsau zet le daite in a fate zet mi thilcii le colh vek in hmuhtheilonak hmun ah a thang sawn ti mi kha thei thiam ding in ralrin nak a pek.  

Castel Gandolfo ih Zarhpi Ni Angelus thlacamnak hmun ih a ra tu pawl hnen ah Pope Leo in St. Matthew Gospel sung ih tahthimnak pa thum – sangvui le hram, antam cii le thilnu(colh)thu kha sim phah in minung ih nunnak le a cangcia mi santhuanthu sung ah Pathian in a hnatuan mi pawl kha a lang ter a si tin a sim.

Pathian cu a mah le mah nasazet ih nehnak co ding hnak in, a fimnak le a thinsaunak ih duhdawtnak   kha lang ter ding ah “thil fate kha a hril sawn” tin Pope in a sim.

“Pathian cun a mah cohlan ding le hnon ding kha zalen zet ih hril thei nak in on/pe a si,” tiah Pope in a sim. Cun Pathian in a duhdawtnak cu “hrambua lak,” hman ah a um ti tla in theiter, a fate bik mi hramcii  vek in hmuhthei lo nak hmun ah hna a tuan ih, sangvut sung ih thilnu vek in, daiten hi leilung pi cu a danglam ter a si. 

Pope in mitampi in hitivek harsatnak kan ton mi le hi leitlun ih thiltha lo pawl hmuahhmuah cu Pathian in hmakhat ten hlonhlo thluh seh ti ruahsannak kan nei theu titla ka thei ko, cu vek ruahsannak cun Kawhhran le Christian nun ih hmuhdan kha thatlonak a thlen ter thei tin ralrinnak a pek.

Cuhnakin, Christian pawl cu thatlonak umnak hmun lak ah Pathian ih uknak ram a  thangso ti mi kha theithiam sawn ding a si tin a sim. Thimnak um hman seh la cui thimnak ah  thatnak hawl thiam ding in zirding, tukforhnak kham thei ding in rangtuk ih thubawhcatnak tuah lo ding in le, thinsau zet le nuam te in Pathian a thluahsuah/zangfahnak hnatuan ah tel ve ding hi a si tin Pope in a sim.

A sim bet mi cu, Pathian uknak ram cu, a cancan ah nitin kan nun ah a lang , hnatuan nak ah hmuhtheih lo in a lang ring ring ko. Pathian a um lo ti ih kan ruahcaan hman ah, Pathian cu kan mah bawm ding in kan lak ah a um ring ring a si ti fiang ten Pope in a sim.

Pathian ih hnatuan nak cu bulpak nun ah siseh,  Kawhhran mi burlak ah siseh, Christian nun ah a cang.

Cun, zumtupawl  ka sim mi pawl kha cohlang thei ding in “Pathian ih thuthangtha kha thupi bik ah ret in” hngalnak, midang pawl nehkhuh duhnak thinlung,  thuneihnak hmang ih zumnak lam feh pit ti vek pawl hi nan hrial ding tin thazang pek nak a nei. Cuhnakin, Christian pawl cu Pathian ih daidim ten a hnatuan nak ah ruahsannak kha ret/neih sawn ding a si.

Cule le Pope Leo cun, Pope Benedict XVI ih sim mi thu vun la in, Christian pawl cu “hramcii ih pianhmang,” kha pom ding ih kawh mi kan si. Cui hramcii cu “ hlawhtlinnak le thatnak  si lo in, mah le mah niamawk ih midang pawl bawm tu ding,” si kha a si tin a sim.

A netnak ah, hi tin, Christian pawl cu kan sung ihsin hi leilung pi thlengter thei tu “ a fate mi  Thuthangtha ih cii” le “duhdawtnak ih thilnu/colh” ah kan cang ding tin a ti.

Pope Leo cu a thusimnak a theh hnu ah, zumtupawl hmuahhmuah Bawinu Mary ih thlacamnak thawng in, Pathian ih Tongkam thlaicii kha tangdornak thawn a cohlang thei tu an si nak ding ah le an hmailam nunkhuasak nak ah bawmnak pe ding in a ap sak.