Pope Leo XIV in Iraq ram, Ankawa ah kumtin mino tonkhawmawk nak an tuah mi ih a ra tu Iraqi Christians mino pawl hnen ah zumnak, duhdawtnak le ruahsannak nei mi missionary si ding le a tunghmun theilo mi boruak le buainak lak ah Khrih ih tleunak pe thei tu si ding in zuam uh law tiah tha a pek.
Pope Leo cun video hmang in mino pawl hnen ih a cah mi cu, Tui kum nan thulu Mission ti mi thawn pehpar aw in, nan nih mino pawl cu tulai kawhhran nunah tuanvo thupi zet nan nei a si.
“Pawlpi cun Khrih ih tleunak kha hi leitlun ah hmuhthei dingin tuanvo tum pi a nei,” tin Pope Leo in a sim. Cule mino pawl khal “a ra lai ding mi hmailam caan ah pawlpi le leitlun hmuihmel mawiter tu ding nan si,”tiah a sim. Cui hlei ah “minopawl cu pawlpi ih hmailam hrang lawng rinsan mi nan si lo, a tu rori caan hrang khal nan si,” tin a ti. A tu Iraq mipi pawl harsatnak nan ton rero mi khal cu khatlam ah cun Pathian in a thuthangtha theihpitu ding ih in duhsak nak tla hi a si tiah a sim.
“Leitlun ih tleunak si ringring ding tla hi a ollo,” tin a sim “Ralbuai le remdaihlonak um ringring nak hmun ah tleunak suahtertu ding ih kawh nan si,” tiah a sim bet.
Hivek dinhmun tong hman sehla nanthanau hlah uh.
“Tih hlah uh! nanmah lawng in nan tuar lo. Kei tla ka lo um pi ve ko; Pawlpi khal in a lo um pi ve. Jesu hnen ah nan zumnak re uh,” tin Pope Leo in sim.
Khrih dungthluntu pawlih nun ti mawiter tu ding mi thil pathum pawl cu, zumnak, duhdawtnak le ruahsannak hi an si.
Pakhat nak ah, tleunak in khua in hmuter. Curuang ah zumnak cu hringnun harsatnak pawl sawnletnak lawng si lo in “thudik theithiam nak le thuhman sung ih nunnak hi a si,” tin Pope in a sim. Cule ” Zumtu pawl cun an mah le mah siseh, midang le leilungpi khal siseh Pathian ih mithmuh vekin zohthiam ding hi a si,” tin tha pek phah in a sim.
Cu theh in, tleunak cu khuahlum nak le Pathian ih duhdawtnak hmuhthei tu hminsin nak a si tin a sim. A dik mi Pathian hnatuan cu kan cangvaih nak in a thok lo, Jesu Khrih thawn tongaw thei dingin nitin thlacam nak le sacrament pawl, a hleice in Bawipai Thi le Sa sannak le sualthlahnak pawl kan tuah mi ihsin a thok a si tiah a sim.
Pa hnih nak, “Nan thinlung kha Pathian ih duhdawtnak ah thum/re uh,” tin Pope in a sim. “Khrih ih thinlung kha hawlsuak uhla, a mah Bawipa ah nunkhuasak ding hi tih hlah uh.”
Pathumnak ah, tleunak cu ruahsannak le thansonak hmuhsak tu a si. Remdaihnak duhnak hmun ah Christian mino pawl cu daihnak tuah tu ding ih kawh an si, tiah Pope in a sim. “Ahleice in, remdaihnak tuah tu ding ah kawh nan si, nan kiangkap ih um mi pawl komkhawm thei ding in le hmailam cansau pi tiang remdaihnak um thei ding in ruahsan nak petu ding ih kawh mi khal nan si.”
A cemnak ah, “Pathian ih thatnak cu rinhlelh hla uh,” tin Pope in a cah. “Pathian in nan nunnak hrang ih a tumtah mi par ah tihhlah uh,” tiah profet Jeremiah ih thutiam mi vun mang sal in, “Pathian in hmailam caan hrang ah ruahsannak a lo pe a si.” tiah a sim.
Himi thu cu Vatican news sung ta a si.
