Zarhpi ni Angelus thlacamnak theh ah Pope Leo XIV in leitlun refugee (a bik in ramuknak thu le biaknak thu ruangah hrem a tuar ih mai khua le ram ihsin a tlan ih beunak hmun a hawltu pawl) ni mangsal in Brazil ramah a cang mi Car rinlo pin cangsualnak ruangih nunnak cemtu pawl le hliam tuartu pawl hrang thla a camsak ih Pentecostal Church pawl khal cibai arak buk.
June 21 ni Zarhpi ni ah St. Peter Tualrawn ih Angelus thlacam theh ah Pope Leo XIV in June 20 ni ih tuah mi World refugee Day ni mangsal in hremnak tuartu pawl, tuahmawh tuartu pawl le ralbuainak ruangah mai inn le Lo tanta in a tlantu pawl humhim dingah a hnget deuh mi peknak tuah sak dingah a rak forhfial.
1951 kum harsat tuartu pawl ih an si daan thawn pehpar aw ih (Convention Relating to the status of Refegees) ih a vei 75 nak hngilhlonak ni ah Pope Leo XIV in leitlun ralpi 2nak theh ah harsat tuartu pawl ih ngah ding mi humhim dingah le mai inn le Lo tanta in a tlan tu pawl hrangah daan thawn pehpar mi humhim sak dingah tumtah ih tathmat mi a cui ramtin lungkim nak ih a thupitnak kha ruatsal dingah arak sim.
Pope Leo in tuisan leitlun pi ah khal refugee tampi an um lai ih an mah thawn pehpar mi daan pawl le upattlak sinak humhim sak dingah tumtah mi pawl cu a hlan vekin a thupit laithu thupit in a rak sim.
Hi a thupi mi ramtin lungkimnak tuah tlangnak a thangphok ter tu thinlung ruahnak cu tuisan khal ah ramtin tuanvo nei pawl ih theihnak thinlung le nuntu zia kha pehbet in lamhmuh theu hram hai seh tiah ka ruahsan” tiah Pope Leo in a rak sim.
Pope Leo XIV in mi lai pawl ih zonzaih harsatnak pawl hmu ko nan in ziangsiar lo nak cu hril ding zianghman a um lo thu a rak sim. “Beunak le humhimnak a hawltu pawl cu ziangti hman in dungtun a ngah lo” tiah a rak sim bet.
Cuihleiah hmuhsuamnak le hremnak a tuartu pawl kha minung pawlkom in cohlan sak dingah a rak forhfial ih an mah dinhmun in “daihnak le mithmai neihnak thawn nung thei in hmailam hrang ruahsannak ah pahtlang thei hram hai seh”tiah thla a rak cam sak.
Brazil ram in khawmzawh tu pawl hnen thu a cah lai ah Pope Leo in kan dung naite ah Ceara ramthen ih a cang mi lamzin ih cangsualnak kha mangsal in a sim. Cui cangsualnak ruangah mino mipa tampi in an nunnak a cem ih Pope in nunnak cemtu pawl hrangah thla a rak cam sakih nunnak cemtu pawl ih sungkhat pawl le a riahsia tu pawl zate khal an mah thawn naiten a um nak le a hnemnak, thapeknak a rak langter.
A cui riahsiat za thilcang ruangah Basket ball team sungtel minung 7 ih nunnak a rak cem. Nunnak cemtu pawl cu kum 15 le 22 karlak mino pawl an si ih Juazeiro do Norte khuapi ih Tlawngphun kim ih thlawngta pawl le tlawngkai a theh zo tu mino pawl an tel. Pope in nunnak cemtu pawl ih innsungsang pawl le thianrual tha pawl le a riahsia tu zate hrangah thla cam sak thu le an mah thawn a riahsiat thu a lang ter.
Pope Leo in Catholic-Pentecostal International Dialogue pawlkom sungtel pawl khal cibai a rak buk. Hi mi thurel tlangnak cu Catholic Pawlpi le Pentecostal Christian sungtel pawl ih aiawhtu pawl thawn kum 50 luan hmunkhat in in pumkhawm sak ih khat le khat theih thiam awknak, Christian unau sinak thinlung le tuantlangnak pawl a khaisang mi thurel tlangnak forum pakhat a si.
Pope in hi tik vekih thureltlangnak cu Christian karlak ah nelawknak le lungrualnak kha a din ih a thupit thu thape in a rak sim.
“Iex orandi, lex credenda” ti mi thlacamnak ih ti daan cu zumnak ih tidaan a si” ti mi hlan lai rinnak kha pehpar in Pope in tuisan ah thlacamnak le zumnak ih pehpar awk nak kha hmunkhat ten ruahtlangnak cu a thupit tuk thu a rak sim. Pope Leo ih simnak ah hi thurel tlangnak cu Christian pawl lakah tamdeuh in theihthiam awknak a suah ter ih tettee khan nak le a hnatuannak pawl ah tuantlangnak kha tha a cak ter thu khal a rak langter. Hi mi thu cu Vatican thuthangin a tawizawng le aremcang thei bik in kan ngan mi asi.
