RVA Falam Service/ November 4, 2026
Pope Leo XIV cun November thla hrangih a tumtah vekin Catholic pawlpi zumtu pawl in rak cam ve dingin a sawm. Liannak ngaingai ti mi cu thilri tampi pam le neih hi a si lo, duhdawtnak thawn pek mi hi a si sawn ti theithiam dingin Catholic zumtu pawl hnenah “thilri neih mi pawl thaten hmang thiamnak ding hrangah” thlacam a sawm.
Pope Leo cun a thlacamnak ah “thingthei rahtha suahter tu dawm, kan ngah mi kan thiamnak pawl le kan pi le pu pawl ih an rak zuamnak pawl hmuahhmuah tel in ziangtinkim kan neih mi cu Pathian hnen ihsin a ra mi an si” tiah a sim.
“Kan mah tei neih mi zianghman a um lo – ziangtinkim laksawng pakhat a si tin tawmawk ding mi a si” tiah a ti. Asinan, a cancan ah cun, “kan hawl mi le kan neih mi thilri pawl ruangah, kan thinlung thatlonak pawl hi a hak ter sinsin ih, duhhamnak in in neh ih mi harsa bik le mi thanau bik pawl in hngilh ter asi,” tiah Pope Leo cun a sim.
Mi hrangah thatnak tuah ding hnak in mai thuneihnak ih thil kan hman le mi tawm/hrawm ding hnak in kan khawl theu mi parah in ngaithiam hram aw” tin Pope Leo in a sim. Thilri neihnak par ih pamhmainak thinlung neih lo nak hin “leitlun a thleng danglam ter” tin a sim bet. Ziangah tile cuvek thinlung cun “thudik lamzin a on sak ih, hngalnak le mi ziang siarlo ih um ter tu hruang pawl khal a siat bal ih mifarah pawl lakah ruahsannak a nei ter” tin a ti.
Curuangah, “Bawipa, na thlarau in kan neihmi paisa, caan, thiamzung le tuahtheinak caantha pawl cu u nau pawl komkhawm nak ih kan hman theinak dingah in zirh aw,” tiah thla ka cam tin a sim. “Sumdawnnak, innsang silole khuatlang thu botcatnak tinkim hi zalennak thinlung ihsin ra suak hram seh. Thatnak hmuahmuah cu mi zate hrangah asi timi theithiam ding in le kan tawmawknak lawng in hmailam caan kan din thei asi timi khal zalennak thinung ihsin ra suak hram seh” tin Pope in a sim bet.
Netabik ah, Pope cun hitin thla a cam “hnatuannak le zangfahnak ihsin thlengaw mi lennak theipi tu ah in tuah aw, cuticun kan nunak cu midang ih nunnak thawn pumkhat a si ding, cule thudik le daihnak umnak hmun Bawipa ih ram a hmuh tu hminsinnak pa khat a si ding. Amen.”
Hi thuthang khal cu Vatican news sung ta lak mi a si.
3 November 2026
