RVA Falam Service/ November 2, 2026
Hebrew le Arabic tong hmang tu catholic mino 300 lenglo cu St. James Vicariate ih hohanak in ruahsannak le rualremnak sunhlawih ding in zarkhat sung tonkhawmawk nak an nei.
Hi mi tonkhawmawknak cu menmen ih tuah si lo in thlaraulam an hmuhton mi le bangawklonak hnak ih thupi sawn mi Kawhhran pakhat sinak ih a diknak kha hawlsal ding, ti duhsan ih tuah sak mi asi.
Israel ram ih Hebrew tong hmang tu pawl hrang ih a tuan tu Fr. Piotr Zelazko in hi tin a sim; holy land ih um mi mino pawl ih nitin an nunkhuasaknak le an thinglung sung ih harsatnak le hriamhma an tuar mi pawl ruahsal ding a duhsak. Zohman harsanak ihsin luat an um lo.
“Kan minungpawl in siatsuah ter tu natnak, hriamhma le buainak pawl cun a tak in kan nunram in thleng ter a si. Ziangah kan ti mi tongkam ka hmang ti a sile kei cu ramdang mi ka si ko nan hitawk hmun ah kum 20 zikte ka um ruangah a si tiah Fr. Zelazko in a ti.
Fr. Zelazko cun mino zate in “ralbuainak, harsatnak le an mah bulpak cio ih an ton mi harnak ruang ih a rasuak mi hriamhma pawl, cun an phurh mi phurrit pawl zaten” an thinlung sung ah an phur” a si tin asim.
Minopawl cu “tuartheinak thazang an ngah deuh ih sualnak ihsin khal an luat sinsin.” Asinan, an tuarmi hriamhma lawng in thu a sim ding tiah” ralrinnak a pek.
“Nikhat hnu nikhat umhar le thin khuruahharnak in a khat mi, leitlun mibur pawlkom pakhat ah cun, nitin thinphannak hlir in a khat mi nunram a tong tu pawl ih um nak hmun ah hin – hriamhma le ninghan lungsiatnak pawl cu mino pawl ih au aw hloter thei ih, harsatnak lailak ihsin an thinlung sung ih um ringring mi rualremnak le u le nau thinlung ti mi tla a phen thei. Asinan, an duhnak vek ih tuan ding ah cun a ol lo. Ziangah ti le minung pawlkom pawl in mino pawl ih tihphannak le an tuarnatnak pawl tuar thei ding in bawmnak pek hi a mal tuk ruang ah a si.”
Fr. Zelazko cun Cardinal Pierbattista Pizzaballa ih mino pawl hnen ih a rak sim dah mi thu sim bet in “ziangtluk ih hnatha thilmawi na tuan khal le, na tuan mi duh lo tu le tha lo pe duhlo tu an um ringring ding ti mi kha hngilh hlah” ti mi thu a sim.
“Cun Catholic Christian sinak in kan theifiang ding mi cu, bangawklonak tam pi lak ah, Khrih ah pumkhat kan si. Cu tin um ding kan si. Jesuh in rualrem ding in in kom lo ah cun, kan zumnakcu a dik mi a si thei lo ding!”
Hi puai a danglamnak bik cu Hebrew le Arabic tong hmang tu Catholic pawl hmunkhat ah in komawk ter thei mi hi a si. Hebrew le Arabic tong hmang mi Catholic pawl komawk nak ni a si thei men, cun leitlun ah hi mi tong phun hnih hmang in thlacamnak hmun pakhat khal a si thei” tin Fr. Zelazko in a sim.
Himi cu Vatican news sung ta lak mi a si.
