RVA Falam Service/ October 29, 2026
Pope Leo XIV in German auto company mawtaw tuah tu thawn tlawngkai ni 3 ni ah an tong aw. Germany Luxury mawtaw tuah tu Mercedes-Benz company cun, Pope to ding mi Mawtaw a tuah sak nak kum 100 zik te kimnak puai an tuah.
Hi hminsinnak puai ah, Pope Leo XIV cun Mercedes-Benz company ih an upa pawl thawn a dang te in tonawknak a nei. Hi ni ah, Vatican Museum(piahtaik) ah Pope ih mawtaw kum zakhat kimnak hmin sunglawi hmang in onnak puai an tuah ih, kum 1930 kum Pope Pius XI hnen ih an pek mi a hmaisabik mawtaw le 1981 kum May ni 13 ni ih Pope John Paul II an pek mi mawtaw pawl tla langternak an nei.
Peter pehzomtu Pope pawl ih an khualtlawnnak hrang ih a thanso pi dan
Pope Leo in Mercedes-Benz company le Vatican hi ti vek ih kum sau pi an pehtlaihawk thei nak par ah lung awi thu a sim. Cun St. Peter ihsin tui nitiang Pope ih khualtluannak lam a thanso dan pawl thu tla a ruah.
“Kum sawm lenglo lai ihsin, Pope ih mawtaw cu mah te khualtlawnnak menmen ihsin zumtu pawl thawn nelawzet ih ton theinak thilri pakhat ah a rak cang. Hi mawtaw in, Pope cu mipi hrang ih a khualtlawnnak le mipi hrang ih puai an tuah tik ah zumtu pawl thawn nai aw zet in a tong aw ter thei” a si tiah a sim. “Hi nan hnatuan mi in mipi thawn tong aw thei ding in le leitlun ah zumnak, ruahsannak le duhdawtnak thuthangtha thang ter ding ah Pawlpi ih hnatuan tampi a bawm” tiah a sim.
Pope in nan tuah mi thilri pawl cu leitlun ah reipi tiang hman theih ding timi tumtah in tuah uh la, “Technology (internet lam hmandan) lam thawn pehpar ih tuah mi thilri pawl tla minung pawl ih an sinak, Pathian ih sersiam mi pawl fingkhawi thiam ding in le mitam pi thathnemnak hrang ah” thatnak pe thei ding in tuah uh tiah thazang a pek.
Tlangleng, sedia gestatoria le santhar thilphurnak(transport)
Roma Empire san a cem hnu ihsin thok in Pope pawl ih an khualtlawn lamfeh dan hi a rak thleng aw ih a thang so zet. Cu mi Roma Empire san lai ah cun, biaknak lam puai an tuah tik ah Pope cu “sedia gestatoria” ti mi tohkhamsang an tuah mi par ah a to ih, minung 12 in cui tohkham cu an zawn/hnor ih cutin Pope cu mipi pawl hmuh ding in an vel pi.
Kum zabi 19 a cemhnu lam ihsin, Pope pawl in santhar (vehicle)thil phurnak an rak hmang. 1895 kum ah Pope Pius IX in a hmaisabik ah tlangleng a rak hmang. Cui hnu 1930 kum ah, Mercedes-Benz ih an tuah mi The Nurburg 460 Pullman mawtaw cu Pope Pius XI an pek ih, cu mi cu a hmaisabik Pope in senpi hmai ih a rak to mi (mawtaw) AutoMobile a si.
“Popemobile” ti mi tongfang cu, 1965 kum ah Pope Paul VI in America ram tlawnnak ding hrang ah a cuangce ih an tuah mi Lincoln Continental mawtaw kha an suansan mi a si. Pope John Paul II san ihsin thok in Pope pawl in Popemobile an rak hmang ih, 1981 kum ah Pope John Paul II thah an rak tum hnu ihsin Mercedes-Benz company cun kilhim awknak hrang ah tin santhar(model) phundang ten an rak tuah sak.
Mercedes-Benz Italy ih CEO in Marc Langenbrinck thawn tuan tlang theinak cantha a ngah mi hi Catholic pakhat a sinak in ka lungawi cuang tiah a sim.
“Catholic zumtu pakhat ka sinak in, tui ni hi ka hrang ah ni mawibik ni a si. Ka hrang ah kan nun sung ih ka tuah ding mi pakhat ka tuah ngah tin ka ruat aw tiah” Langen Brinck cun EWTN News hnen ah a sim.
Mercedes-Benz company ih vice president Marcus Breitschwerdt cun, popemobile ih an ret mi kilhimnak le a lamfehnak ding danzia pawl hrang ih an tumtah mi pawl a sim. “pakhatnak ah, thilphurtu(vehicle- mawtaw, cycle…) cu siatsuahnak um lo ten nuamhnazau zet ih a feh theinak ding in le bahnak a ton hman ah him thei ding in, cun miburpi lak ih a feh tik ah thilcang thei ding mi buaibah nak hrang tiang tel in a humhimnak nak ding hrang ruat in kan tuah”tin Breitschwerdt in EWTN News a sim.
“Curuangah, ralthuam thawn tuah mi kan nei, tulai santhar hman mi humhimnak thlalang khal Popemobile ah kan nei,” tin a sim bet. Cule daanfuhzet mi pa khat kan nei mi cu- Popemobile sung ah zohman an to thei lo, himi mawtaw tuahtu pawl sung ihsin hman in totheinak khuan an nei lo tiah a sim.
Himi thuthang cu EWTN news sung ihsin kan ngan mi a si.
source : #ewtnnews #VaticanNews
