Pope in Spain Bishop pawl hnen “Pawlpi ih thazaang cu a fale pawl ih thianhlimnak in a ra” tiah sim.(June 8, 2026)
Spain Bishop pawl hnen thu a simnak ah Pope Leo XIV in Pawlpi ih thazaang cu thilri lole ram a silo ih “ Amai fale pawl ih thianhlimnak in a ra a si” tiah ralrinnak a rak pek. Cuitlunah thalcamnak ah hram a bun ih Khrih kha duhdawt tu Puithiam pawl hrangah Pa vekin duhdawtnak vekin lamhmuh ding khal ah a rak forhfial.
Pope Leo XIV in tuini Tlawngkai nikhat ni Madrid khuapi ih Bishop pawl kom hmunpi ih a tonnak ah a rak sim mi asi. Harsatnak tampi a um ko ding nan an zumnak le an thutiamnak pawl tha a peknak ah Pope Leo in “lungrualnak kha kilhim dingah, thurel tlangnak kha khaisang dingah, thenthek awknak kha hrial dingah le nan mai hnen ih ap a si mi minung pawl ih nunram tluanah tel dingah” sawm an si thu a rak sim.
Pope Leo in Pathian cu kan mah lam in hmuhtu a si ih thuanthu le minung pakhat ciar ih nunram pawl kha a uktu Pathian a si thu a rak sim. A mai ti daan in kan feh ih a ngaingai ah cun Bawipa thawn taksa ruangpi pakhat dinhmun in kan feh thu khal a rak sim.
Hi a thuk mi pehtlaiawknak ruangah Pawlpi cu tuisanah a thangso rero mi thleidan awknak le khat le khat thei thiam awklonak karlak ah bangawk lo nak sungah lungrualnak kha tetti a khan mi a nung mi tetti khannak kha kan hmuh a tul tiah Pope Leo in thupit in a rak sim.
Pope Leo XIV in zumtu pawl cu thianrual tha ih a langsar mi tetti hmuh dingah kawh kan si tiah a rak sim. A hleice in Khrih thawn kan pehzomawknak kha thupit in ret dingah kan cohlan mi zumnak kha Pathian ih ttongkam thawn Pawlpi ih tuahdaan kel parah ngaisang in kan kilhim a tul tiah thupit in arak sim.
Pope Leo in “a sunglam ih a remdai mi Pawlpi pakhat in Christian unau pawl, biaknak dang pawl, zum lo tu pawl le a cozah thuneitu pawl tel in minung zate thawn zalen zet in pehtlaih dingah a rak sim. Cuitlunah mino pawl, Puithiam cang dingin zirlai tu pawl le thanautu pawl thawn nai ten um ding khal ah a rak forhfial.
Pope Leo in Spain ram kha “Maria ih ram” tiah Pope John Paul II in a rak sim dah thu khal mangsal in a rak sim. Cuihleiah Maria cu rualremnak le ruahsannak ih nu a sithu a sim ih Bishop pawl hrangah a mah cu khualtlawnnak ih a hmaisabik rualpi le a tumbik mi thilmankhung a sithu thupit in a rak sim.
Pope Leo in Bawinu Maria cu Pathian ih ttongkam kha cohlangin thinlung sungih kilkhawi daan, dungthlun tu pawl ih khualtlawnnak lamtluanah feh tlang daan le Pawlpi ih lamtluan ih tel daan pawl kha zumtu pawl hnen a zirh thu a rak sim. Cuihlei ah Bawinu Maria hnenah Bishop pawl ih riantuannak pawl a ap ih minung pawl lak khal ah bawm dingah thlacamnak thawn a rak ap.
Pope in tui kum cu Spain ram Puithiam pawl kilkhawi tu St. John of Avila ih Puithiam a rak cannak kum kim hngilh lonak kum 500 kim lum khal asi tiah a rak sim. Pope Leo in Puithiam pawl cu Bishop pawl hnenah thuneitu pakhat lawng silo in lam hmuh sak tu Pa pakhat vekin an hmu ding kha a thupi tiah a rak sim. Cuihleiah Puithiam pakhat le pakhat karlak khal ah hmuhton mi thawn a khat mi khualtlawnnak sungah riahsiatnak, lungawinak pawl kha tuarpi tlang aw in unau dinhmun ah nung tlang dingah a rak forhfial ih hi khualtlawnnak cu Khrih kha a hawl mi khualtlawnnak a si thu khal a rak sim.
Pope Leo XIV in zumtu pawl dinhmun in Pathian hnen “Bawipa na thinlung kha in pe aw” tiah thla kan cam a tul ih cui thinlung cu Pathian hnen hoihnak, khual tlawn thoknak, thu ngainak , thlei dang thiamnak, hnatha tuannak , duhdawtnak thawn tuah saknak, thinsaunak le lungawi zet ih thannak pawl kha a tuah thei mi thinlung a si a tul tiah a rak sim.
Pope Leo XIV in Khrih ih thinlung a cohlang mi Pawlpi cu lam hmuhnak, bomnak, humhimnak le hnemawknak pawl kha a pe thei mi “ Mei thuam” kha ken thawn a bangawk thu a rak sim. Cuithil in Pawlpi kha harsatnak pawl zaten tawng thei dingah a tul mi thazaang a pek thu khal thupit in arak sim. Hi mi cu Vatian thuthangin Pope ih Spain ram ih Bishop pawl hnen asim mi a tawizawng in kan ngan mi asi. Kan thuthang a rak ngaitu zate parah Pathian thlawhsuahnak um hram seh.
