Pope Leo in Spain a thlawnnakah Gospel thuthangtha ih nan rinumnak lungkim pi dingah le a thar in thangphawk dingah ka ratnak a si tiah sim.(June 6, 2026)
Nan lak ih ka ra tlawnnak cu zumtu pawl sungah Gospel thuthangtha parih nan rinumnak kha ngamhnget dingah, thazaang pe dingah le a thar in thangphawk nak dingah a sivek in hi ram ih pawlkom pawl le a dang dang pawl kom pawl karlakah lungrualnak le tuantlangnak khal khaisang dingah a si tiah a rak sim.
Pope Leo XIV in Spain ram ih zarhkhat rei a Tuukhhal khual tlawnnak ih a thlennak Zarhte ni ah Spain ram Madrid ih Royal Palace of Madrid ah ram ih thuneitu pawl le ram Palai pawl thu a simnak ah hi tin a rak sim a si.
A thusimnak ah Pope Leo XIV in Spain ram cu “International Law le (multilateralism) kaphnihhnakin tam mi pawlkom parah rinum zet ih an thlunnak ruangah a lungawi thu a rak sim. Cuihleiah cui nan rinumnak cu “remdaihnak le miphun pawl karlakah lungrualnak hrang thatho zetin dikzet ih nan tuannak cu a langsar a si” tiah a rak sim.
Holy Father in pehbet in a sim mi ah “mai ram sungah tonawk ih thurel tlangnak le ram mi khat le khat nel awknak kha din dingah hmai lam ruahsannak ah mifar pawl le mino pawl ih hmuhnak kha telh in ruat dingah, mahte ukawk nak le lungrualnak pawl ih dilnak pawl kha kaihaw dingah, cuihleiah a dang rampi pawl kha dodal nak silo in minung sungkua zate hrangah laksawng pakhat dinhmun in Europe ih lungrualnak kha khaisang dingah” tha pe in a rak forh fial.
Pope in hi khualtlawnnak hrangih in sawmnak pawl le keimah thawn nan umnak ruangah ka lungawi tiah a rak sim. Cuihleiah hi ram cu “kum thawng hnih zikte lai Gospel thuthangtha kha a rak cohlang tu a thupi zet mi rampi pakhat” tiah a rak sim. Simtheu a si vekin Iberian Peninsula Tikhulh ih Gospel thuthangtha a rak simtu Dungthluntu James the Greater ih simnak le a pehpar mi pawl a rak sim.
Hi mi parparnak cu a thupi zet mi theological thawn pehpar in san a neih thu a rak sim. Tiduhsan cu hi mi cu hi hmun ih Pawlpi dinhmun in Pentecost ah a rak thok mi dungthluntu pawl ih biaknak lam mission thawn pehbet in a um mi thawn a pehpar awk thu kha theih a si ruangah a rak simnak a si.
Pope in cuihleiah Christian zumnak le hi ram karlakah hlanlai ihsin a rak um mi pehpar awknak cu an mai nunphung ah thukzet in a thlenter ih tui ni tiang minung sungkua zate dinhmun in hmunkhat ten pah rero mi harsatnak pawl karlakah ruahsannak le tumtah nak a nei mi hrampi pakhat a si thu a rak sim.
Hi thu thawn pehpar in Pope in St. John of the Cross le St. Teresa of Avila tei ih pawl kha mangsal in a rak sim. An mah pawl cu Pathian ih a thuk zet mi duhdawtnak le a thuk mi thil um daan pawl parh ih an rak ngaihsaknak pawl in thianrual tha dinhmun ah an can ter. Cuihleiah Spain ram in a langsar mi hi Mithianghlim pahnih cu kan dung kum 500 lai in Pawlpi ih nunram le minung tampi ih thlarau lam ah mi an khat ter ih Spain ram ih ramri khal lam ih a thlen thu kha Pope in a rak sim. Pope in cuithlunah St. Ignatius of Loyola thu khal ruatsal in a rak sim.
Pope in pehbetin a sim hrih mi cu Spain ram cu remdaihnak, thil phunkim ih tuah tlangnak le International Law kha nan thlunnak ruangah ka lung awi tiah a rak sim ih ramsung le ramleng phunhnih ah remdaihnak le lungrualnak khaisang dingah thape in a rak forhfial. Cuitlunah Pope Leo in “Pathian in Spain ram kha thlawhsuah peh hram seh” tiah a rak sim. Hi mi thuthang cu Vatican thuthangin a tawizawngin kan ngan mi asi.
