Pope Leo ih June thla hrang thlacam tumtah mi cu Lehpannak ih man pawl hrang tumtah. (June 2, 2026)
Pope Leo XIV in June thla hrang a mai thlacam tumtah mi a suah ih Catholic zumtu pawl hnen “lehpannak ih man pawl hrang” thlacam sak dingah a rak sawm.Lehpannak cu remdaihnak, unau thinlung thawn minung khat le khat lungrual mi komawknak kha khaisang dingin thlacam cio dingah a rak forhfial.
Pope Leo XIV in leitlun ih Catholic zumtu pawl hnen June thla sungah Lehpannak ih man pawl hrangah a mah thawn thlacam tlang dingah a rak forhfial. A mah cu Pope ih Leitlun thawn pehpar mi thlacamnak Network (Pope’s Worldwide Prayer Network) in timtuah in suah mi thla tin “Pray with the Pope” Video kha kan dungzarh nili ni ah a rak suah.
A thlacamnakah Pope in lehpannak khawvel ah ngah thei mi that hnemnak pawl kha a ngamhnget vekin cu mi ih a tel mi harsatnak pawl khal ralrinnak a rak pe. Cuihleiah Lehpannak cangvaihnak pawl cu remdaihnak, unau thinlung thawn minung khat le khat karlakah lungrualnak khaisangthei dingah a rak sawm.
Pope in “lehpannak ti mi laksawng hrangah mai taksa ruangpi hmannak in Pathian ih thawm huham langsar ter duh tu pawl hrangah lehnak hmun ih a cang theu mi rualtha sinnak hrang le pawlkom ih lehnak ih ngah mi nuamnak hrangah Pathian hnen a lung awi thu a rak sim.
Cuihnuah Pope Leo XIV in Pathian cu “kan nunram khal ah lehpahnak ih zuamawknak vekin zohman in mah pakhat lawngin ruundamnak ah thlen theih a si lo thu” in zirh a si tiah a langter. Curuangah “kanmah pawl cu thanglian dingah, upatnak kha zir dingah, mai Laitek mi pawl ngahsuak thei dingah le hmunkhat ih ngah mi nehnak pawl kha lungawi ten sunloih thei dingah midang pawl kan tul” tiah Holy Father in thupit in a rak sim.
Curuangah Pope Leo XIV in Lehpannak cu “duhsan nei lo ih zuamawknak si lo in unau sinak thinlung a zirh mi fimthiamnak Tlawng si dingah, hnonawknak hmun si lo in minung khat le khat tonawk ih pehtlaih theinak hmun pakhat si dingah, tuahsiat nak ih lamzin silo in remdaihnak ih lam hmuhnak pakhat si dingah thla a rak cam.
Curuangah Pope in Lehpannak cu nehnak ngah ding lawng silo in khat le khat duhdawt in upatnak, lungrualnak, remdaihnak le unau sinak lungput a din sak thei mi a thupi mi tidan pakhat si dingah a rak sim.
A lektu pawl, a zirhtu pawl lole tha a pe tu pawl cu lehpannak ah nunphung pawl hmun khat ten a kom ter mi miphun pawl a lungrual ter mi, upatnak, lungrualnak le mahte thansonak pawl kha a karhzai ter tu thlaci a tuh tu leitlun thawn pehpar mi ttong pakhat khal hmu thei hram hai seh” tiah Pope in a rak sim.
Cuihlei ah Pope in lehpannak zaten “Bawipa thawn a nung tlang mi nunram ih tahthimnak pakhat cang hram seh. Lungawinak thawn thasuah ih zuamnak thawn tuah thei hram hai seh. Bawipai thawhsalnak ih in pek mi nehnak hrangah khal lungawi thiamnak thinlung nei thiam dingah” ah a rak sim.
Acemnakah Bawipai thlarau cu kan hnenah um ringring hram seh. Kan Thuanthu tluan ah rualawknak le unau thinlung kha din dingah Bawipa thawn thin khat lung khat a si mi team khat dinhmun ah lungrual ter hram seh” tiah thla a rak cam. Hi mi thu cu Vatican thuthangin a tawizawng le a remcang ding zawngin kan ngan mi asi.
