Angola ram Kilamba ih Missa sumnakah Pope Leo XIV in Jesuh cu Angola Pawlpi thawn a feh tlang” tiah sim. (April 19, 2026)
Pawlpi ih zirh mi pawl thlun aw, an zirh mi pawl zum aw. Jesuh Khrih kha zoh awla, a mai ttong mi thawn Eucharist ( Bawipai thi le sa) ah a lang ding asi” tiah Pope Leo in Kilamba ah 2026 April 19 Zarhpi ni ah a rak sim. Hi ni cu Africa ram ramli a tlawnnak ih Angola ih a sim mi a si.
Missa raithawinak sungah lungawinak thinlung thawn Eucharist (Bawipai thi le sa) tuah rero lai asi. Hi laksawng hrangah Pathian hnenah ka lungawi ih in rak hmuahnak par khal ah ka lungawi tiah a rak sim.
Easter puai zarhlinak ah Pope Leo XIV in Gospel thuthangtha sungih Luke ih thuthangtha arak sim. Cu mi cu Emmaus fehnak lam tluan ih a feh tu a dungthluntu pahnih ih thu a si. Adungthluntu pahnih in Jesuh an thlun ko nan a thihnak an zoh tikah an riahsiatnak thawn Jerusalem in an suak ih an mai khua Emmaus khua an tlung. A thoknak ah cun an riah a sia nan an dungah Jesuh a feh ti an theih tikah ziang hmuahhmuah a rak thleng aw thluh.
Pope Leo XIV in tui ni ih thuthangtha ih a thoknak kan zoh tikah Angola ram ih dinhmun kha kan hmu thei tiah a rak sim. “Hi ram hi a mawi zetnan hriamhma a nei, ruahsannak, remdaihnak thawn lungrualnak kha a tul a si” tiah a rak sim.
Pope Leo XIV in “lamzin ih dungthluntu pahnih in an saya parih a cang mi pawl beidong zet ih an sim mi cu an ram ih farah harsatnak pawl kha in mang ter” tiah a rak sim. “A rei mi ramsung ralbuainak, huatawknak le thenthek awknak pawl, ram sung suak pawl a dik lo ih hmannak ih farahnak pawl” khal an tel tiah pehbet in a rak sim.
Pope Leo XIV in Pathian thawn kan pehthlaihnak ah a mah thawi um tlangnak kha kan tep thei tiah a rak sim. Pope in thlacam caan, a mai aw ngai caan ah a dungthlun tu pahnih vekin thinlung sungah meisa alh vekin a um theu. A hleice in Bawipa thi le sa ah Pathian kan tong thei” tiah a rak sim.
Pope Leo XIV in “nan mai nunphung thu hram ah a tel mi mai nunphung daan hrekkhat pawl kha ralringin zoh an tul. Cu mi tidaan pawl an man hla zet ko nan mit ih hmuh thei lo mi thuneihnak pawl le dawi lam zumnak pawl lole zum ding a silo mi ruahdaan pawl thawn a rawi aw thei ih thlarau lam ih kan khualtlawnnak ah that hnemnak um ter lo ih tihnungza ah a si thei” tiah a rak sim.
“Pope Leo XIV in Pawlpi cu Emmaus ih a feh mi dungthluntu pahnih hrangah Jesuh in Sang a phel sak vekin mah le mah a ap aw mi nan mah pawl vek midang tampi a tul” tiah a rak sim.
Pope Leo XIV in Angola ram ih Bishop pawl, Puithiam pawl, missionary pawl, biaknak lam hnatuan tu nunau , mipa pawl vek mi tampi a tul thu a rak sim. An mah pawl in an nunram an rak hlawm vek in khat le khat pek awk theinak thinlung neih a tul tiah a rak sim.
Pope Leo XIV in “a thosal mi Khrih Jesuh ih thatnak ruangah kan nih khal thilcang ngaingai mi ih a thleng aw ter thei mi “Sang phel” vekin a si thei” tiah a rak sim. Pehbet in a sim mi cu Eucharist (Bawipa thi le sa) in kan mah pawl cu ruangpi pakhat, thlarau pakhat in si ter tiah ralrinnak a rak pe. Hi ti vekin kan ni khal hlanlai ih thentheknak, bangawk lonak pawl ret nawn lo in ramkhat le ramkhat, huatawknak thawn doawknak pawl a um nawn lo mi ram, nawhthuh lak nak le einak kha thudik thawn zem ranawknak thawn a dam ter thei mi ram ramkhat din ka duh tiah a rak sim.
Pope Leo in “Hi ti vekih kan tuah lawngah ruahsannak a nei mi hmai lam a cang thei ding, a hleice in ruahsannak a hlo mi mino pawl hrangah” tiah a rak sim.
Pope Leo in Missa raithawinak ih a thusim cemnak ah “ram mi pawl ih ruahsannak thawn hmailam zoh uh, hmailam caan hrangah ruahsannak din uh” tiah a rak forh fial.
Pope in tih hlah, nan mah thawn a feh tlang mi thihnak in a thosal tu Jesuh a mah in Sang vek in a lo hlawm dingih a thawhsalnak ih tetti pawl, nunphung lam ti daan thar ih hruai tu pawl ka lo si ter duh” tiah a rak sim.
Pope Leo in hi khualtlawnnak sungah hi ram ih Catholic zumtu pawl cu Pope ih naih niamnak le thlacamnak pawl kha rinhnget dingah tha pe in a rak sim. Cuihleiah an mah pawl cu Bawinu Maria ih kilvennak sungah a rak ap. Hi mi thuthang cu Vatican thuthangin a tawizawngin kan ngan mi a si.
