Pope in “Jesuh in nan nuntuzia thuhla a thei ih Bawipa thawn feh tlang dingah tiah mino pawl hnen sawm”. (November 13, 2026)
Peru ram Lima khuapi ah mino pawl thawn thlacam tlangnak caanserh ah Pope Leo XIV in mino pawl hnen a hlanih tuah mi sualnak pawl tampi thawn asilole nunram a thar in thok dingah a tlai zo tin a ruattu pawl khal Jesuh in an thuanthu a thei ih Bawipa in a mah thawn fehtlang dingah pehbet in a sawm thu tha pe phah in a rak sim.
“Nanmah lak ah mihrek in thilsual tampi ka tuah a si tin a silole nunram kha a thar in thok dingah a tlai zo tin nan ruat men thei. Asinan ka lo sim duh mi cu Jesuh kha zoh uh. Bawipa cu nan mai thuanthu kha a thei ih Bawipa thawn feh tlang dingah a sawm rero a si” tiah Pope in a rak sim.
Tlawngkai nili zanlam ah Peru ram, Lima khuapi Estadop Nacional ah mino pawl le university tlawngta pawl tel in thlacamnak caanserh ah Pope in a tuvek ih thapeknak a rak sim mi a si. Cu mi caanserhah Peru ram ah a hmaisabiknak a thlennak nikhatnak zanlam ih a sim mi a si. Cu mi caanserh ah minung mipum 60000 luan an rak tel.
Pope in Bawipai sawmnak kha lehrul dingah nan mai hmailam caan hman ding daan zaten theih a tul lo. Tui ni nan tuah thei mi kekal khat kal aw. Bawipai duhdawtnak kha zumaw la Bawipa ih lam hmuhnak kha cohlang aw. Tuletu ka sim vekin Pathian cu kan mah kan feh lai khal ah kan feh nak ding lamzin in zirh a si” tiah a rak sim.
Jesuh in nan nunram thawn pehpar mi hmuahhmuah a thei duh.
Pope in mino pawl ih nunram ih ruahsan mi thawn pehpar in a hrek khat thusuhnak pawl cu kan thinlung sungah reipi a caam thei thu a rak sim. Jesuh in hi mi pawl zaten a thei theh ih a ngaihsak a si. Ziangah tile nanmah pakhat ciar a thei duh a si” tiah arak sim. Cuihleiah thlacam dingah ttongfang hawl in kan thei lo lai khalah Jesuh hnenah tlaitluangzet in sim dingah a rak forhfial. Bawipa in kan mitthli le kan theih lo mi thusuhnak pawl a thei a si. Zumnak in nunram ih khualtlawnnak lam tluanah thazaang in pek ih harsatnak pawl in a cem lo ding thu ralrinnak khal a rak pe. A hrekkhat riahsiatnak pawl cu tikcu le bawmtu kut pakhat a tul thu a rak sim.
Pope in mino pawl dinhmun in midang pawl ih ruahsannak lawngin nunnak cu lungkim men lo dingah a rak forhfial. Pope in Jesuh cu mino pawl a ko rero tu rualpi tha a sithu ralrinnak a rak pe ih thlacamnak, Gospel thuthangtha ngainak le thianghlim sacrament Missa raithawinak ah telnak thawngin cui rualpitha sinak kha tamdeuh in hnget ter dingah a rak forhfial.
Netabikah Pope in mino pawl hnen Khrih kha zum dingah a rak forhfial. “nanmah a lo theitu, a lo duhtu, ziangtik lai khalah a lo hnong dah lo mi rualpi tha pakhat kha na zum vekin Bawipa kha zum uh” tiah a rak sim. Cuihnuah thlawsuahnak a um tu Bawinu Maria le Peru ram ih mithianghlim pawl ih thlacamsaknak in rinhngetnak kha nitin thang ter dingah mai khawhnak cu thatho zetin nun pi dingah le Pathian thawi rualpi sinak hnget ter dingah thlacam dingin a rak forhfial.
Caanserh cemnakah mino pawl dinhmun in Jesuh kha nitin tamdeuh in zum dingah thlacamnak a rak hoha. A thlacamnak cu Jesuh Bawipa ka lo zum a si. Jesuh Pathian Bawipa ka lo rinsan a si. Jesuh ra aw. Ka thinlung sungah rungtum aw. Kan innsang sung khal ah rung hram aw. Kan Pawlkom sung khal ah ra hram aw. Kan nunram sungah zamrang ten ra aw. Bawipa Pathian zamrang ten ra hram aw. Hi mi cu Vatican thuthangin a Peru ram a tlawngtu Pope Leo XIV ih sim mi a tawizawngin kan ngan mi asi.
