Africa ram ih ninganak a khualtlawnnakah Pope Leo XIV in leitlun pi thawn pehpar ih in le ei paamnak bawmnakah “kanzaten kan tel a tul”tiah sim.(April 17, 2026)
Africa ramtluan ih a Tuukhal khualtlawnnak ninganak ah Pope Leo XIV cu Douala khuapi ah minung mipum 120000 thawn Missa raithawinak hoha in a rak tuah ih Yaounde khuapi ih University thlawngta pawl kha a thianghlim mi daimen ih um men lo nak ( thlarau lam ih tuah duhnak thinlung) kha nei dingah a rak sim.
Tlawngkai ninga ni ah nitlaknak saklam ih um mi khuapi Bamenda ah nawhthuh einak pawl kha a rak soisel ih remdaihnak a dil hnu nikhat a rei ah Pope Leo XIV in Cameroon ram ih a thupi mi buainak cu in le ei harsatnak a si thu kha pehbet in a rak sim.
Rampi ih sumdawnnak a laifannak khuapi a si mi Douala ih Missa raithawinak ih a rak sim mi sungah Pope in Jesuh in “bangnak ruangah tha mal mi pawl, a rilrawng tu zaten zoh dingah” in sawm ih “nang ziang na tuah ding” tiah mitin in in sut tiah a rak sim.
Cameroon ram ih mipumx zatek 40% zikte in farahnak hnuai ah an um ih International Federation of Red Cross and Red Crescent Societies in February thla ah minung 3.3 million hrawngin in le ei harsatnak an tong thu an rak suah.
Missa raithawinak sungah Pope Leo XIV in Gospel thuthangtha sungih minung 5000 mangbangza in rawl a do thu ruat in a rak sim. Minung thawngnga an rilrawng in Pathian thuthangtha ngai duh in an um lai ah Jesuh Khrih in a dungthlun tu pawl hnen ziangti tuah ding tiah a rak sut. Hi mi thusuhnak hi tui ni khal ah kanmah zaten in sut a si. Anetnabik ah cui mipi pawl zaten an zemawk ruangah rawlei ding an ngah ih “ rawlei ding cu mitin hrangah a um, kan zemawk tikah tiah a rak sim.
Pope Leo XIV in Missa raithawinak ih a teltu minung 120000 hrawng hnen “hi rawl hi cuhawknak kut thawn si lo in a pe tu kut in kan lak a sile zokhal rilrawng laitamnak an tuar lo ding” tiah a rak sim. Hi mi thuthang cu Vatican thuthangin a tawizawng le a remcang ding zawngin kan ngan mi asi.
