Bamenda ih Missa raithawinak ah Pope in “minungih thu silo in Pathian ih thu sawn ngai dingah”sim.(April 16, 2026)
Cameroon ram nithlaknak lam ih a um mi Bamenda khuapi ih Missa raithawinak ah Pope Leo XIV in cui hmun ih farah harsatnak le thudik lo ih tuahnak pawl thu a rak sim. Cuitlun ah Cameroon mipi pawl kha remdaihnak le rualremnak a um mi hmailam dinnak zuamnak ah Pathian ih ttongkam kha zum in mah le mah ap awk ding a rak sim.
Cameroon nitlaknak lam ih Bamenda ih Missa raithawinak a tuahnak ah Pope in “mitin ih sinak kha upat in cu mi upatnak ih a tul mi thuhram hum dingah remdaihnak le lungrualnak a um mi hmailam kha a hlawl mi” minung pawl ka lungkim pi tiah a rak sim.
Hi caanserh cu vanzam colhnak Airport ah tuah as ih minung 20000 hrawng an tel thei. Pope in “a mawi mi hi ramah buainak pawl tampi a um ih ruahsannak pawl tu le tu an hlo thei” tiah a rak sim.
Pope Leo XIV in in le ei harsatnak pawl a kau vivo tiah a rak sim. Cuitlunah a hleice in sumpai le sumhram pawl tawlrelnak ah eiruknak pawl a um ih hi mi pawl in pawlkom le a hrampi a si mi inn pawl thangso dingah a kham tiah a rak sim.
Pope in fimthiamnak le harhdamnak lam ah harsatnak pawl a um ih mino pawl telin minung pawl tampi cu ramlengah an suak tiah a sim. Pehbet in a sim mi cu “thinlung sungih huatawknak le doawknak ruangah buainak cu a sang sinsin, cuihleiah mai hlawknak hrangah Africa kha hmangin a miat hawl tu pawl ruangah tuahsiat nak pawl a cang” tiah a rak sim.
A tikcu a kim zo tui ni ah thaizing a silo lungrualnak kha din dingah a si tiah a rak sim. Jesuh Khrih ih dungthluntu pawl mangsal in hi tin a rak sim mi “an mai tetti khannak cu mipi pawl kha ralrin peknak aw, hmailam thu simnak le a tha lo mi thil tinak kha a tha lo asi ti ih langternak a si” tiah a rak sim.
Pope Leo XIV in “minung ih thuneihnak silo in Pathian thu lawng kan ngai a tul tiah a rak sim. Hi ti vekih tuah tu pawl in mai sungih zalennak kha an hawl sal ih remdaihnak le lungrualnak kha a din thei tu pawl ah an cang” tiah a rak sim.
Anetnak ah amah in “Pathian thu kan ngai a sile thlengawknak a cang thei” tiah pehbet in a sim ih zumnak kha thup vekih umnak pawl a silo le a hman lo mi ruah daan pawl thawn kom aw lo sehla a tha tiah ralrinnak a rak pek. Hi ti vek ruahnak pawl kha reilo te ah remkhel le sumdawnnak hlawknak hrangah an hmang thei theu ti khal in a rak sim.
Pathian lawngin kan mah pawl in zalen ter, amai ttongkam in lam ih hmuh sak, a thiangthlarau in kan mah pawl cu mithar ah in can ter” tiah a rak sim. Hi mi thuthang cu Vatican thuthangin a tawizawng in kan ngan mi asi.
Photo – Vatican News
