Remdaihnak hrang thlacamnak ah Pope Leo in “ thihnak le hriamhrei pawl khuakhannak cawl thlang uh” tiah sim. (April 11, 2026)

Ralbuainak hmun ih nauhak pawl hnen in cakuat tampi ka rak dong. Cu mi cakuat sungih ka siar tikah nauhak pawl ih a thiang mi hmuhnak cu  mihrek khat pawl in an uarawk ih an simmi an tuahnak ziang tluk in tih a nung ih minung ngaingai sinak thinlung an nei lo” tiah a rak sim.

Zarhte ni zanlam ih Vatican ih tuah mi remdaihnak hrang thlacamnak ah Pope Leo in tihnungza thilcang pawl hrang ralrin peknak a ral nei ih  “nauhak pawl aw kha ngai sak tlang uh si” tiah forhfial in a rak sim.

Leitlun hmuntin ih mipi pawl in Pope thawn Rosary ih thuthuk an ruat tlangih mah mipum rori khal tel ih a hlatnak hmun khalin thlacamnak ah an rak tel. Hi thlacamnak cu Saint Augustine of Hippo, St. John Chrysostom le St. Ambrose of Milan pawl ih zirhnak pawl khal an rak hmang.

Rosary thlacam laiah a bangaw lo mi Continent ih zumtu pawl in Lamp of Peace ih meisa cawng in meisa an rak vang. Hi mi meisa cu St.Francis of Assisi ih Thlan ih a alh ringring mi meisa a si.

Pope in thlacamnak ah mah rori ih a ra tu pawl le hmun hla in thla a camtu zaten remdaihnak hrangih thla nan cam ruangah ka lungawi tiah a rak sim. Hi thlacamnak cu Jesuh ih a rak sim vekin Tlang pawl hman a thawn thei mi zumnak vek a si tiah a rak sim. Pope in “ralbuainak in minung pawl a thenthek aw ter, ruahsannak cu minung pawl kom aw ter dingah a si. Hngalnak in midang pawl kha a pal, duhdawtnak in minung pawl a khaisang, Milem biaknak in khua hmu thei lo dingin mi a tuah a sinan a nung mi Pathian in cun tleunak kha in pe” tiah a rak sim.

Tui dinhmun ah “ziangkhal in kan mah hmailam hrangah ruat cia ih kaih cia a ngah lo. Hi khuavel ah Thlanmual hman diah aw lo dinhmun tik cu caan ah minung pawl in pakhat le pakhat naa dingin nunnak kha an siatsuah a si, thudik lo le zaangfahnak khal an ruat nawn lo” tiah a rak sim.

Pope in mah zawn lawng ruahnak le paisa uar tuknak ruahnak pawl hrangah ralrinnak a rak pe. Thuneih duhnak langternak pawl khal a tawk thlang, ralbuainak khal tawk thlang seh, thazaang ngaingai cu nunnak humhinak tuahnak kha asi” tiah a sim. Curuangah tui ni ih remdaihnak kha ruahnak thlinlung in a hril tu minung pawl,  mino pawl, upa pawl ih thinlung ruahnak zaten komkhawm aw uh si. Ralbuainak ruangih a cang mi thinnatnak pawl dam in a siat mi pawl rem tlang uh si” tiah a rak forhfial.

Hi dinhmun ah ralbuainak ruangih riahsiat tuartu mawh nei lo nauhak pawl kha ruat sal dingah ralrinnak a pe ih minung pawl ih tahnak au aw kha ngai sak in humhim sak dingah a rak dil.

Pope in Ram uk tu pawl in tuah lo theih lo in tuanvo tumpi an nei ti kha a rak sim sal. Ramuk tu pawl kan lo dil tiah a sim ih “cawl thlang uh, a tu cu remdaihnak tik cu caan a si. Hriamhrei remnak cabuai pawl silo in reltlangin buainak remnak cabuai ah to tlang uh” tiah a rak forh fial.

Pope in leitlun ih um mi mitin hnen khal ah tuanvo pakhat kan nei tiah a rak sim.Ralbuainak kha ttongfang lawng silo in mai tuahnak khal duh lonak thu lang ter uh si. Thlacamnak in kan mai thinlung sungah a tanglai mi ralbuai duhnak thinlung pawl hlon dingah in sawm a si. Curuangah nitin kan din mi remdaihnak rampi ah hawi tlang uh si. inn pawl, Cazirnak Tlawng pawl, kiangkap pawl, nunphung le kiangkap hnenveng ih kan din mi ram a si.

Anetnakah Pope Leo in Thinglamtah parah duhdawtnak thawn kan hrangih a pe awknak ih man a si mi a thosal mi Khrih ih remdaihnak kha mitin hnenah um hram seh tiah thla a rak cam. Cuihnuah remdaihnak thlacam dingah a rak sawm. Hi mi thuthang cu Vatican thuthang in a tawizawngin kan ngan mi asi.