Pope Leo XIV in nisuahnak a laifannaklam ih ralbuainak an cawlnak kha a lawm ih thurel tlang dingah forhfial.(April 8, 2026)
Pope Leo in nisuahnak a laifannak lam ih ralbuainak colhnak thuthang kha a lawm ih buainak kha cemter dingah a teltu pawlkom zaten reipin thurel tlang dingah a rak forh fial.
April 8 ni Tlawngkai nithum ni mipi a ton hnuah Pope Leo in nisuahnak a laifannak ih a cang mi buainak ruat in a rak sim. April 7 zaanah zarhhnih sung doawknak cawl dingih an thannak parah “a lung a kim zet ih ruahsannak nei ter mi lamzin pakhat a si” tiah a rak sim.
St.Peter tualrawn ih a khawmtu zumtu pawl a simnak ah Pope Leo in “thurel nak cabuai ih an kirsal lawngah ral cu a dai thei ding” tiah thupit in a rak sim. Cuihnuah hi tivekih a thupi mi palai lam hnatuannak kha thlacamnak thawn bawm dingah a forhfial ih “thurel tlang duhnak thinlung neinak in leitlun hmun tin ih a dang pawl buainak pawl kha ti dai thei dingah lamhmuhnak a si thei” tiah a rak sim.
A netnak ah Pope Leo in April 11 ni ah St.Peter tualrawn ah remdaihnak hrang thlacamnak tuah dingah a rak sim bet. Mitin kha a hmun ah ra in tel dingah a sawm ih a ra theilo tu pawl khal mai um nak inn in tel thei a sithu a rak sim. Hi thlacamnak cu Rome tikcu caan zaanlam 6:00 pm ah tuah a si dingih Pope a mah rori in a hoha ding a si.
Iran, American le Israel pawl cu nisuahnak lam a laifannak hmun ih a nasa zet mi siatsuah thei mi ralbuainak hrangah zarhhnih rei kahawknak an cawl ding thu a rak sim. Tlawngkai nihnih ni zaanlam ah America President Donald Trump in Iran ram zaten ka siatsuah ding tiah hringhro in a rak sim nan a rak thlah poih sal.
Thlawngkai nithum zinglam ah an suah mi thuthangah Israel Prime Minister Benjamin Netanyanhu in Trump ih Iran a donak kha zarh hnih sung cawl dingih a ti mi ka lungkim pi ko nan a cui ralbuainak ah minung 1500 luan an thi ih cu mi ah Lebanon ram ta pawl an tel hrih lo thu a sim. Hi mi thuthang cu Vatican thuthang in kan ngan mi asi.
