Easter Puai in huatawknak a kiangter ih thazaang caktu pawl khal tang a dor ter mi thazaang pakhat asi.(April 4, 2026)
RVAFalamservice, April 5, 2026.
Easter zan Missa raithawinak ah Pope in “minung pawl kha a thenthek aw ter ih a siatsuah tertu sualnak cu Pathian in minung pawl a komaw ter ih nunnak kha a pe sal thei mi duhdawtnak thawn a lehrul sal” tiah a sim.
Zarhte zan St.Peter Basilica ih Easter Missa raithawinak a hoha lai ah Pope in thatnak, thatlonak le nunsalnak thu a rak sim. Pope in hlanlai hla pakhat thawn pehpar in a rak sim ih “Easter in huatawkank kha a kiangter ih minung pawl ih lung a rual ter vekin thuneih duhnak lalnak pawl khal tang a dor ter tiah a rak sim.
Easter ih a thupi bik cu Jesuh a thawsalnak a si ko nan “tuizan ih a thianghlim mi thuthup in kumzabi tluan ah kauzet in a um” tiah Pope in a rak sim.
Liturgy ti kawh mi biakthawinak nak ih siar mi Bible Cathianghlim vei 9 siarnak sungah, Pathian thawn rualremnak a pe ih zaangfah lainatnak lam zin” a sangsangin hmuh a theih tiah Pope in a rak sim. Hi mi lamzin cu Pathian ih sersiamnak ihsin thok in Israel miphun pawl Egypt ram in an suahnak thu St. Paul ih Pathian hnatuannak tiang a peh par aw.
Ruundamnak thuanthu ih thilcang mi pawl kha a pehaw ih “ minung pawl kha thenthek ih a siatter tu sualnak kha Pathian in minung pawl kha a komaw ter ih nunnak a pe thei mi duhdawtnak thawn a rul sal” tiah Pope in arak sim.
Pope in Gospel of Matthew sungih ngan mi Jesuh thawhsalnak thu a raksim. Marie tei pahnih Jesuh thlan ih an fah laiah thimkhuazing a tlung ih Thlankhar mi a rak ong aw. Cui caan ah nunau pawl ih an hmu mi cu “that lonak cu zing tluk in thazaang cak hmanseh, Pathian ih duhdawtnak a cak sawn, minung pawl in lei taksa cu an that thei nan Pathian ih pek mi nunnak cu kumkhua nunnak a si ih thihnak hman a neh thei, Thlan khal kil a theih lo” tiah Pope in a rak sim.
A thusim mi a cemnak lam ah Pope in tui ni ih on ding mi Thlan thu a rak sim. Hi mi pawl cu zumnak nei lo, tihnak, maizawn lawng ruahnak, lungkim lo nak, ralbuainak, dik lonak, ram le miphun ih an tanawknak pawl khal an tel. Hi mi pawl in cangvai thei lo in in cang ter tiah a rak sim. Cumi ai in hlan mithianghlim pawl ih “ngaihsak nak thawn tuanvo an laknak” kha cawngin Easter puai ih pek mi lungrualnak thawn remdaihnak, leitlun hmunkip ah karhzai thei dingin” zuam cio dingah a rak forhfial. Hi mi thuthang cu Vatican thuthangin kan a remcang ding zawngin kan ngan mi asi.
