Pope Leo XIV ih Lenten (Vua tikcu caan) hrang thucahnak ah zumtu pawl hnen midang thinlung a na ter thei mi ttongfang pawl hrial dingah le rang tuk ih mi par ih thuthennak hrial dingah sawm. (February 13, 2026)

Kei in nan hnenah nunram ih nunpi mi a tuletu upat sunloihnak ngah lo mi ulh dan pakhat ah ka lo sawm duh. Cu mi cu mai kiangih um tu pawl kha thin a na ter mi hmuhsuamnak ttongfang pawl ttong lo in kilhimnak a si.

Pope Leo XIV cu 2026 kum ih Lenten (Vua sung) thucah nak ih a thupibik dinhmun in a cui sawmnak kha telh in a langter ih cui a sawmnak cu kan dung Tlawngkai ninga ni ah an rak suah.

Lent (Vua) Tik cu caan cu February 18 ni Thawngkai nithum ni ah a thawh vekin Pope Leo XIV in biakthawinak thawn pehpar mi tikcucaan cu Christian pawl hrangah “Pathian ih a thuk in a sang mi mai nunram ih a laifannak ah ret thei dingah caan tha pakhat in peknak a si” tiah a rak sim.

A sim mi cu nunthlengnak ih khualtlawnnak tin ah Pathian ih tongkam in kan mai thinlungsungah tong dingah kan onnak in a rak thok. Hi ti vekin kanmah pawl cu rundamnak a petu Khrih ih zonzaih harsatnak, a thihnak le a thawhsalnak ih thuthuk a si mi sungah a dungthlun dingah kan mai thutiamnak kha a tharthawhsal a si.

Pope Leo in Pathian thu ngainak le mai kiangkap ih minung pawl ih thu ngaisaknak ih thupit zia kha a langter ih mahlemah kha a hman mi pehtlaihnak sung lut thei dingih on awknak a si.

“Mai nunram le nunphung karlak ih a um mi aw tampi karlakah” tiah a mah in a rak sim. Cathianghlim cu riahsiatu pawl le harsatnak a tuartu pawl ih aunak aw kha a thei ih lehrul dingah kanmah kha in bawm a si.

Pope Leo in a simnakah Khristian pawl cu Pathian in a tul daan  vekin thu ngai thiam theinak a nei ter ih farah harsa pawl cu kan mai um daan pawl, sumdawnnak pawl le Pawlpi kha zuamnak pawl a can ter thu, thei thiam theinak pawl khal a lang ter.

Cuihnuah Pope in rawlulhnak in kanmah pawl kha thudik hrangah a thuk mi duhnak nei dingah in tuah sak thu thupit in a rak sim. Cui duhnak thinlung cu kan mai tuah theu mi lungkimnak le cangvaihnak um lo mi tuahnak in in luat ter.

Rawl ulh nak cu taksa ruangpi thawn a peh par awk ruangah mai hal ngaingai mi thil le nunnak ih um lo thei lo ih a tul mi ti ih ruah mi pawl kha ol ai ten in then sak thei tiah a rak sim. Cuitlunah mai duh nak pawl kha a tawk zawn in tuah thei dingah a bawm ih thudik hrangih halnak le tidai hal nak kha nungter in cangvai dingah in kilkhawisak a si ti khal in pehbet in a rak sim.

Cuitlunah a sim hrih mi cu rawl ulhnak cu mai duhnak thinlung kha thiangter nak, luat ternak le kauh ternak thawngin a supaw ter ih a cui duhnak thinlung kha Pathian le a tha mi thil tha tuahnakah in hruai a si.

A sinan rawlulhnak kha zumnak, tangdornak le Pathian thawn pehtlaihnak  sungah tuah ding a si ih hngalnak lam pan ih tuah dingah a si lo thu Pope Leo XIV in a rak sim. Cuihlei ah mahlemah supawk thiamnak a dang ti daan pawl khal raltha deuh in a tlaitluangih a menmen mi nuntu ziaza lam ah a pan ter thu telh in a rak sim.

Cuitlun ah Pope in minung pawl in tuletu an ralrin theu lo mi rawlulh nak ti daan pakhat lam a rak hmuh. Cu mi cu midang pawl kha thin naa ter tu ttongkam pawl  hrialnak kha a si.

Kan ttongkam hman daan pawl kha mi thinhennak daiter thei mi ttongkam in thok thlang uh si. Ahriam mi ttongfang pawl le ol ai ten midang par ih thuthennak kha hrial tlang uh si. Mai lam ih a um lo tu pawl, mah le mah humhim aw theilo tu pawl parah huatnak ttongkam hmannak le thu sia relnak pawl khal ralring dingah Pope in a rak sim.

Mai ttongkam ah ralringin hmang dingah zuam tlang uh si. Innsungsang sungah, rualpi karlak ah , hnatuannak ah, social media (Facebook, messenger, twitter, Instagram) parah, ramkhel lam thu reltlangnak pawl ah, thuthang thannak media pawl le Christian pawl karlakah duhdawt zaangfah thiamnak le upat peknak kha cing in phun tlang uh si” ti khal in pehbet in a rak sim.

Hi ti vekih kan tuah thei a sile huatawk nak ttongkam pawl cu ruahsannak le remdaihnakih ttongfang pawl hrangah hmun pek ding a si tiah Pope Leo XIV in a rak sim bet. Cuihnuah Pope Leo in thu ngainak le rawlulhnak pawl ih a thuk ih a thupit zia a sim bet ih hi mi pawl cu kan Parish ah, kan innsang pawl ah le biaknak lam ih pawlkom sungah a ngaingai in kan nunpi thei thu a rak langter.

Farah harsa pawl ih aunak aw pawl kha ngai saknak le mai thinlung kha Khrih hnen ih thleng thei mi lamzin ah kan retnak in kan mai thinlung muril kha tuah dingah kan ti thei ter ih mai nunram le pehtlaihnak pawl ih thilti theinak kan khaisang thei tiah Pope Leo XIV in a rak sim.

Hi mi cu thudik ih dinhmun ah kan mai tuah dingih duhnak thinlung ih harsatnak pawl kha a ti duh mi a si. Cuihleiah mai lungduhnak pawl lam a hruai tu kha ziang asi, khui mi a si ti thei nak khal a si. Biakinn lam ih pawlkom pawl sungah siseh, minung ih thudik thu hman thu ah le rualrem salnak hrangih halnak thawn pehpar in siseh tiah Pope Leo in a rak sim.

Pope Leo XIV in 2026 kum lenten ( Vuasung) hrangih thucah mi cemnak ah Christian communities Pawlkom pawl kha harsatnak tuartu pawl cohlangnak hmun si dingah a rak sawm.

Kan mai hman mi ttongkam tel in rawlulhnak in a ra mi thazaang kha dil uh si tiah Pope in a rak sim. Curuangah mi thinlung a na ter thei mi ttongkam pawl malter in midang pawl ih aw kha tam deuh in a ngai thei mi hmun sersiam thei hram uh si” ti khal in a rak sim. Hi thuthang cu Vatican thuthangin a remcang thei bik dingih kan ngan mi a si.