Jubilee kum cu a cem thlang ko nan, kan mah pawl cu zumnak thawn khual tlawngtu pawl dinhmun in pehbet in nung dingah Pope Leo in forhfial. (December 20, 2025)
Pope Leo XIV cu Jubilee kum ih netabik Zarhte ni khawmzawh tu pawl thawn an tonawk laiih a sim mi thuthangtha ah Jubilee cu a cem thlang ding nan Christian pawl dinhmun in ruahsannak thawi khualtlawngtu pawl dinhmun in nung dingah hi thu hi a cem men ding a si lo thu theihter nak a rak nei.
Christmas puai pi khal a nai zo vekin Christmas ih Thuthangtha khal a si mi ruahsannak thawn pehpar in Thuthangtha simnak ah a rak telh. Ruahsannak cu tihnak a pe lo. Khrih Jesuh thawngin Pathian thawn naite ih umnak a si. Khrih a tel lo mi ah “Bawipa cu a nai zo” ti ih au nak cu hrinhronak lawng a si. Asinan Khrih a umnak ruangah cui au aw cu zaangfahnak ih thutiam ah a cang. Khrih ah hrinhro nak a um lo ih ngaithiamnak lawng a si. Jesuh Khrih ih minung cannak ruahnak in nunnak petu Pathian a si thu, ziangtik lai khalah a thar sal thu kha fiangzet in a hmuhnak langternak a si.
Pope in Paul ih Rome khua ih ca a kuatnak thawn pehpar in “Ruahsannak thawn kanmah cu ruundam kan si” tiah a fiang lo mi ruahnak phun a silo. A nung mi thazaang a suah ter theu a si.
Ruahsanak a um lo cun nunnak a um lo.
Ruahsannak a um lo cun kan ni cu mithi thawn kan bang aw. Ruahsannak thawn kan mah pawl cu tleunak ah kan thleng. Ruahsannak cu thlawsuah pakhat a si. Nunnak a cangter mi Pathian ih thilti theinak a si. Ahman mi thazaang cu ukawknak lole tihphannak kha thilti theinak ah hmuh a theih lo. Hrinhronak le thahawk tuahnak cu thazaang cah ruangah a si lo. Lungruhnak, tihnak ih tuahmawhnak, ziangvek thatnak hman a cang ter thei lo mi that lonak a si. A cui dinhmun thawn a kalh aw ih Pathian ih thazaang cu ruahsannak in a rung suak a si. Curuangah ruahsannak cu hrinsalnak asi.
Leilungpi le farah harsa pawl ih tahnak aw kha ngai uh.
Leilungpi thawn pehpar in a simnak khalah Tirhthlah Paul ih simnak kha sirsan in zumtu pawl hnen a rak forhfial mi cu leilungpi le farah pawl ih aunak aw kha ngai sak uh. Leilungpi sungih a um mi thilman kung pawl cu mitampi hrangah a si nan mimalsawn in dik lo in an mai bul ta hrangih an tuahnak thil tha lo hrangah phunzai ciar a si. Pathian in a mai sersiamnak kha minung zate thatnak hrangih tumtah in a rak tuah. Curuangah kan tuanvo cu mah hrang lawng ruah a si lo thangter tamter dingih tuah ding asi.
Harsatnak pawl cu zumnak mit ih hmuh tikah duhsannak thar in pe. Tahthimnak ah nauhrinnak nat kha ruat hnih uh si. Minung pawl a karh ter. Minung pawl cu ruahsannak thawn an nung. Harsatnak thawn Pathian ih sersiam mi ah tel dingah a rak sawm. Thuanthu cu Pathian le a mah a ruahsan tu pawl ih kutsungah a um. Bawinu Maria ih nunram le Christian pawl thlacamnak kha ruah tikah Nazareth khua ih Maria cu nunnak ih ruahsannak ih zohthimtlak a si.
Pathian ih tongkam cu a tak nunram ah a nun pi ih Jesuh ih aw, taksa, a mithmai kha kan langter a tul. Jesuh Khrih in veikhat suah sal a duh. Curuangah kan mah thawng in Jesuh Khrih ih aw, a taksa kha leilungpi kan pek thei a tul. Hi mi cu nauhak pawl ih a suahnak ih a san, sersiamnak in a rak hngahhlap mi asi.
Ruahsannak nei dingah Leilungpi cu Pathian ih uk mi Leilungpi si dingah a sithu a rak sim. Hi mi cu Vatican thuthangin a tawizawng in kan ngan mi a si.
