Ralbuainak tihnungza karlakah hriamhrei um lo mi Remdaihnak tuah dingah Pope Leo XIV in sawm.(December 18, 2025)
January 1 ni ih tuah dingmi leitlun remdaihnak ni kha Pawlpi in thupit in a tuah caan ah Pope Leo XIV in tihphannak, raldo dingih thazaang tamternak le ralbuai ding vekin a lang mi leitlun dinhmun kha a rak ruat. Cumi ni hrangah a suah mi a hmaisabik sunloihnak ca ah Pope Leo XIV in a tui tikcu caan hi a thupit zia le a natsat zia kha sawhkhih in a rak sim ih thazaang hmannak silo in nun can ziaza thawn pehpar mi lamhmuhnak, thurel tlangnak le minung thinlung thlengnak in ralbuainak a kham thei mi “ hriamhrei um lo in remdaihnak” ti mi ruahnak a rak pek.
“Remdaihnak cu nan hnenah um hram seh” ti mi thihnak in a thosal tu Khrih ih ttongkam cu a mai sunloihnak ca ih a laifannakah um tiah a langter. Pope Leo XIV in cui ttongkam cu remdaihnak kha dilnak lawng silo in a cohlangtu pawl sungah a hmun mi thlengawknak kha a ngaingai in a cangter tiah a rak sim. Cuitlun ah Christian remdaihnak cu donak kha el in a cangvai ih a nung mi hmuhton mi remdaihnak a si tiah fiangzet in a rak sim.
Tihphannak cu Pope ih ruahnak sungah a langsar mi a thupibik mi thu pakhat a si. Remdaihnak cu minung nunram ah a tul zet mi a si ti ih hmuh nawn lo tikah nunphung pawlkom dinhmun in ralbuainak cu silo theilo mi a si tiah veikhatkhat ah cun a tul mi vekin in hmu ter tu thuhla pawl kha cohlannak cu Pope in ralrinnak a rak pek.
Ramleng ral do thei dingah a cozah hruaitu hrek khat pawl in raldonak hrang sumpai tthan dingih tuahnak le a cui hrilnak pawl kha a dik lo mi sannak, tulnak vekin tampi simnak cu a ngaingai ah cun a kaih lo tiah a rak sim.
Hi ti daan cu kilhimnak kha a suahter lo ih rem lonak kha hram a bun sawn, tihphannak pawl a karhzai ter tiah a mah in a rak sim.
Pope Leo in ralbuai dingih thubawhcatnak parah a suakmi leitlun fimthiamnak tidaan thar pawl, a hleice in a lem a si mi Artificial Intelligence hmannak pawl khal tel khawm in a rak sim dah. Minung nunnak le thihnak parih thubawhcatnak pawl thawn pehpar mi thu bawhcatnak pawl kha cet pawl in tamdeuh in tuanvo an lak nakah sumdawnnak ih hlawknakin hriamhrei bunnak thapeknak cu minung thawn pehpar ih hmuhnak hrambun mi daan thu thawn pehpar mi a hrampi pawl kha phatsatnak pakhat a sithu Pope in sawisel in a rak sim.
A cui sunloinak ca ah mipi thuneihnak pawl thu khal telh in a rak langter. Pope Leo XIV in ram palai thu, a tawkmawi ih reltlangnak le international law kha pehbet in thlun dingah a rak forhfial ih lungkimnak capi pawl siatbalnak le international dinhmun ih pawlkom pawl ih thazaang mal vivonak parah a thin a phan thu langsar in a rak sim.
Remdaihnak cu zanmang vekih ruahnak men a si lo ih bulpak dinhmun, nunphung pawlkom tiang le ramkhel dihnhmun ah tuah ding mi hrilnak pakhat a sithu, thupit ih a langter. Cuihlei ah Pope Francis ih tong dah mi thawn pehpar in donak kha a um lo thei lo ih tul vekih tarlang mi ruahnak pawl kha ralrinnak a rak pe. hi vek ruahnak cu mipi parih thuneihnak lak dingah hmannak thil pawl a sithu khal ralrin pek nak thawn a rak sim.
A ngan mi sunloihnak ca cu ruahsan nak kha hrambun mi hmuhnak pakhat in a rak cemter ih hriamhrei pawl cu Lothlawhnak thilri ah a thleng ding ti mi Bible casungih thukamnak kha mangsal dingah a rak sim. “Ruahsannak ih Jubilee tikcu caan sungah Pope Leo XIVnak in minung zaten hnen thinlung, ruahnak, le nunram zaten “hriamhrei siatbalnak” kha tuah thok dingah a rak sawm ih Pathian ih thukamnak pawl in tuanvolaknak kha a dil thu rinsan in zum dingah a thangphok.
Pope in “Remdaihnak cu a um cia mi a si ih kan sungah a um duh” tiah a rak ngan. Cui remdaihnak cu tuahcop ding mi a si lo ih cohlangin hmuak dingah a sithu, Cuitlun ah a mah in “ kan mah pawl kha hriamhrei phoih in ret dingah” lungkim ding thu khal thupit in a rak sim.
“Remdaihnak cu a um cia mi a si ih kan sungah a um duh. Hnatuan, tuanvo laknak ah cu mi cu tuahcop ding silo in cohlang in pomnak le cu mi in kan mai hriamhrei phoih in ret dingah caan tha peknak a si.tiah Pope in thupit in a rak sim.” Hi mi thuthang cu Vatican thuthang in a tawizawng le a remcang ding zawngih kan ngan mi a si. kan thuthang a rak ngaitu zate parah Pathian thlasuahnak um hram seh.
