Pope in Australia ih dotuarnak ruangah a riahsiat thu langter. (December15, 2025)
Pope Leo XIV in Australia ram Sydney diocese ih Archbishop hnen telegram in ca a rak kuat ih December 14 ni ah Jewish Community ih do tuarnak ruangah minung 16 in an nunnak a cem ih cu mi thilcang ruangah thinna in um tu minung tampi pawl hrangah a riahsiat thu ca in a rak kuat ih a mai thlacamnakah an mah thawn an um thu khal a rak sim.
Australia ram Bonsi Tipi kap ih a cang mi donak thu a thei tikah Pope Leo XIV nak in Secretary of State Pietro Parolin ih lethmat tthu mi telegram ah Sydney ih Archbishop a si mi Anthony Fisher hnenah a rak kuat ter.
Pope in Hanukkah puai hmang dingin a pumkhawm aw mi Jewish community pawl sunnak ruangah a riahsiat tuk thu khal a rak langter.
Holy Father a si mi Pope Leo in san a neilo mi tuahsiatawknak ruangah riahsiatnak a tongtu zate le nunnak cemtu pawl ih thlarau hrang khal thla a cam sakih an mah thawn naiten a um thu a rak sim.
Pope Leo XIV in donak tuah dingah a duhtu pawl an thinlung an tlengih remdaihnak lamzin kha hawl dingah ruahsan nak a neih thu khal pehbet in a rak langter. Cuihlei ah hliam tuartu pawl lakih tuamhlawm rero lai mi pawl hrang khal ah thla a cam sak vekin duhdawt mi a sungtu pawl hrang khal ah hnemnak an ngah theinak ding hrangah thla a rak cam sak.
Pope Leo XIV in nunnak cemtu pawl hrangah Pathian ih kutsung ah a ap sakih Austrilia ram mi zaten parah Pathian ih remdaihnak thlasuah an hnenah thleng seh tiah thlaza cam phah in telegram ih a cakuat nak cu a rak cem ter. Hi mi thuthang cu Vatican thuthang in kan ngan mi a si. Kan thuthang in siarsak tu zate parah Pathian thlawsuahnak um hram seh.
