India, nisuahnak lam ih Lourdes ah Bawinu Maria suahni minung tampi caanserh ah tel. ( September 9, 2025)
Bawinu Maria suah ni sunglawi puai hngilh lonak ah India ram Tamil Nadu ah Bawinu Maria upatnak puai ni 11 sung an rak hmang ih cu mi ah minung tampi an rak tel thei.
September 8 ni ah India ram Tamil Nadu, Nagapattinam district ih “Basilica of Annai Velankanni” ti ih mitheih tam mi “Basilica of Our Lady of Good health” Harhdamnak Bawinu Maria Basilica Biakinn pi ah Bawinu Maria suahni puai sunglawi cu minung million khat lai in an rak hmang thei.
Harhdamnak Bawinu Maria upat sunloihnak thinlung thawn minung tampi pumkhawm in lungrualnak a canter ih Bawinu ih tangdornak le thianhlimnakah zohthim mi Maria ih nunram ruangah upat sunloihnak an rak pe.
Velankanni Basilica ih tuah mi Maria ih suah ni sunglawi cu August 29 in an rak thok. Cumi Puai onnak ah Bishop Sagayaraj Thamburai in zumtu pawl ih thla an cam laiah “Ave Maria Flag” Alaan an tar ih thlasuah peknak caanserh an hmang.
Harhdamnak Bawinu Maria hnen upat peknak ih tuah mi ni 11 sungah Novena Missa raithawinak tel in Missa raithawinak zinglam in zanlam tiang nikhat ah vei 14 tuah a si ih cu mi ah Tamil, English, Marathi, Konkani, Malayalam, Telugu le Hindi ttong in tuah asi.
September 8 ni Missa raithawinak ah Archbishop George Antonysamy, President of the Tamil Nadu Bishops’ Council in hoha in Missa raithawinak huha in an rak tuah.
Tamil Nadu Annai Velankanni Basilica cu Gothic style ih sak mi a si ih kumzabi 16 ah Bawinu Maria le a fapa Jesuh naute Jesuh cawi in langnak veikhat, kumzabi 17 ah Bagala Tipithuanthum ih thlisia hran ruangah Longmawngtu pawl an luatnak hrambun ih rak tuah mi a si.
1962 Noveber 3 ni ah Pope John XXIII nak in Annai Velankanni Biakinn pi cu Basilica dinhmunah a rak khaisang ih cu mi cu nisuahnak hmun lam ih Lourdes tiah a rak pek.
Tuikum lawngah Tamil Nadu Annai Velankanni Basilica ah ni 11 sung Novena ah zumtu minung tan 3 ( 3million) luan in khawm an zawh. Hi Basilica cu India ram ih Bawinu Maria sunloihnak hmun pakhat a si ti ih ngamhnget a si vekin Hindu, Muslim le Christian pawl hmunkhat ah lungrual ten an ap awknak puai khal a si. Hi mi thuthang cu Vatican thuthang in a tawizawngin kan ngan mi a si. Casiartu zate parah Pathian thlasuahnak um ko seh.
