Catholic Biakinn ah ziangruangah hlawban (Incense) rimhmui urnak an hmang?
RVA Falam Service, May 13, 2026.
Catholic Biakinn sung lole Puai pakhatkhat ih Missa raithawinak sungih rimhmui thawinak kha na thei in na rak hmu ngah maw?
Bulpit, Biaktheng kiang lole Bible cathianghlim siarnak, mipi umnak kiang lam meisa khu a kai kha kan hmu theu ding, ziangruangah Pawlpi in kumzabi tampi sungah hi rimhmui urnak kha a hmang ringring tiah thusuhnak a um theu.
Catholic Biakthawinak ah rimhmui urnak cu ceimawi dingah lole a rimhmui ding lawng silo in a thuk ih a sang mi Bible Cathianghlim thawn peh par mi le thlarau lam thawi pehpar mi san a nei.
- Thlacamnak cu Pathian hnen a thlennak ih hminsinnak.
Rimhmui thawinak cu a par lam ah a kai vekin zumtu pawl ih thlacamnak khal vancungah a kai ti mi aiawhnak a si.
Saam 141:2 ah “ka thlacamnak cu Rimhmui ai ah I co sak awla, ka kut ka thlir mi cu, zanlam thawinak ai ah i san sak hram aw” tiah kan hmu thei. Hi mi Cathianghlim ah biakthawinak ah rimhmui thawinak hmannak hrangih a langsar mi Cathianghlim sirsan pakhat asi.
- A thianghlim mi thil pawl sunloihnak.
Missa sungah Puithiam lole Bishop in Rimhmui urnak thawn a tanglam vekin sunloih a si theu.
- Biangtheng (Pulpit)
- Bible Cathianghlim
- Eucharist(Bawipai thi le sa)
- Thianglamtah
- Puithiam
- Zumtu pawl
Hi mi tuahnak pawl in Pathian le a thianghlim hmun pawl upatnak a neih thu langter nak a si.
- Eucharist (Bawipai thi le sa) ah Khrih a mah rori a umnak thu.
Catholic zumtu pawl in Eucharist (Bawipa thi le sa) cu Jesuh Khrih ih a ngaingai ih a thi le a sa ah a cang tin zum a si. Curuangah consecration le Blessed Sacrament kha upat peknak tuah caan ah Rimhmui ur nak kha a hleice in hman asi. Hi mi cu Eucharist (Bawipa thi le sa) sungah a um ngaingai mi Jesuh kha biaknak upatnak ih hminsinnak a si.
- Thianhlimnak le thian ternak ih hminsinnak,
Bible ca sung kan zoh a sile rimhmui ur nak cu Pathian hmaiah a thianghlim mi sumnak raithawinakah hman a si.
Thuphuan 8:4 ah “Pathian hmaiih a dingtu vancungmi ih kut ihsin rimhmui urnak meikhu cu Pathian minung pawl ih thlacamnak thawn an kai tlang” tiah a langter. Hi mi cu hlanlai Christian pawl ih biakthawinak tampi kha a rak khuh a si.
- Biakthawinak ah ruahnak zaten thawi telnak,
Catholic biakthawinak cu hminsinnak tampi thawn a rak khat.
- Hmuhnak
- Theihnak
- Taksa thawi tonnak
- Cangvaihnak
- A rim theihnak pawl tla an rak hmang a si.
Rimhmui ur thawinak in Missa raithawinak cu nitin tuah menmen mi silo in a thianghlim mi a si thu ralrinnak in pe a si.
- Pathian ih umnak kha in thei ter.
Bible Cathianghlim kan zoh a sile khuadur le meiku pawl cu Pathian ih humham le thianhlimnak kha a tuletu a aiawh a si. Tahthimnak ah Biakinn pi cu Pathian ih huham thawn a khat tikah a thianghlim mi meiku in Pathian ih umnak kha alang ter asi. Thlarau lam dinhmun ah rimhmui urnak in Missa raithawinak cu leitlun ih pumkhawmnak pakhat ti lawng silo in vancung ih biakthawinak ih telnak a si thu in thei ter a si.
Atawizawngin kan sim a sile
Catholic Pawlpi ah Missa sungih Rimhmui urnak hmannak cu
- Thlacamnak pawl Pathian hnenih a kainak
- A thianghlim mi thilri pawl upat peknak
- Pathian ih umnak langternak
- Eucharist (Bawipa thi le sa) sungih Khrih kha upat ih biaknak pawl an si. Rimhmui ur thawinak ih meisa khu a par lam ih a kainak in biakthawinak cu vancung le Pathian ih huham neihnak ah a khih hmuh thu zumtu pawl in theih ter nak asi. Hi mi cu Catholic Dailies in kan ngan mi a si. Kan ca a rak siar theutu zate par ah Pathian thlawsuahnak um hram seh.
