RVA Falam Service/ October 26, 2026
Pope Leo in October ni 25, Zarhpi Ni Angelus thlacamnak hmun ih a ratu mipi pawl hnen ah thukham lak ih a sang bik timi Bible bungcang thu a ruah mi sung ihsin a sim mi cu, duhdawtnak cu zumnak ih muril pi bik a si ih kan kiangkap um mi pawl hrangah laksawng a si a tin a sim.
“Kan u le nau pawl hnen ah kan duhdawtnak kan hmuh thei lo ah cun Pathian kan duhdawt ngaingai kan ti thei lo”. Mathew cathianghlim sung ah daanthiam pawl in Jesuh hniksak nak ih an suh mi thukham lak ah khui mi a sang bik ti mi cu, Jesuh in cathianghlim Deuteronamy sung ih tongkam thawn: Na Pathian cu na thinlung le na thlarau zaten na duhdawt ding tiah a let. Cuvek ih a leh tik ah, Khrih in Pathian thawn kan pehtlaihawknak ih a thupitnak bik ah duhdawtnak hi a ret mi a si ti a lang fiang.
Ziangtinkim tuah thei tu cu a mah Pathian lawng a si ti lawng zumnak neih men le theih men in a tawk lo. “Bawipa in a mah thawn kan bulpak pehtlaihawknak hi a zoh: Pathian taktak a si mi lawng kan Pathian si ding a duh a si” tiah Pope Leo in a sim.
Duhdawtnak thukham cu tuanvo pakhat men a si lo. Cun hramhram ih fial theih mi khal a si lo. Ziang ruangah ti le “zohman in mi ih fialnak men in mi a duhdawt thei lo ruang ah” a si.
Pathian par ih neihmi duhdawtnak cu minung ih lungduhnak thukbik kha a lang ter mi a si ih, cu mi cu a mah thawn pehtlaihawknak ah famkim ten hmuh thei a si. Kan duhdawtnak cu, “kan hmai ah a um ringring” kan ti tik ah Pathian ih duhdawtnak kan rulhsal thei lawng ah a dik mi a si. Cu ti ih rulhsal thei lawng ah thinlung, ruahnak le thlarau zaten na duhdawt ding ti ih Bawipai’ a dil mi kha tuahthei tu a kan si.
A pahnihnak thukham: “nang mah le nangmah na duhdawtawk vek in na innhnen pawl duhdawt aw” ti mi a si. Hi thukham a pahnih ih tiduhsan mi cu a bang aw. Khrih ih mitzohnak thawng in le Pathian thawn pehtlaihawknak thawng in kan mah le midang pawl kan zoh thei. “cutin, mai hamtamnak pawl khal kan neh thei, mah le mah lawng lawng duhawknak hman hi zawnruahnak thinlung ah a cang. Kan nunnak cu midang hrang ah laksawng ah a cang” tiah Pope Leo in a sim.
Cu theh in Pope Leo cun duhdawtnak in Kawhhran ih nunnak le hnatuan(mission) a cakter ti theithiam tu St. Threse of the Child Jesus ih ngan mi “Duhdawtnak lawng in Kawhhran sungtel pawl a cangvai ter thei,” ti mi a sim hnu ah duhdawtnak a mit ahcun tirthlah pawl in thuthang tha an phuang nawn lo ding tiah a sim.
Duhdawtnak um lo ahcun,” kan zumnak khal zianghman a si lo ding, kan hnatuan tha pawl tla nuncan ziaza men ah an cang ding, kan ruahsanank khal cu a lak men a si ding.” Cu ruangah, Pathian kan duhdawtnak le midang kan duhdawt nak hi then theih lo ami an si tiah Pope Leo in a sim.
Himi thu cu Vatican news sung ihsin kan lak mi a si.
October 25, 2026
