RVA Falam service/ October 22, 2026
Pope Leo in siizung aihsin a tumhnu a hmaisabik mipitonnak a tuah nak ah, a hrang ih thla a camsak tu zumtu pawl zate par ah lungawi thu a sim.
Cui hnu ah innsang le thitawknak thu pawl zirhnak a nei.
“A hmaisabik ah thla I cam sak tu nan zate par ah tam pi ka lung awi. Pathian in ka hrang ih a siannak par khal ah ka lung awi. Pathian ih zangfah nak le a that nak par ih kan rinsanak hi tharthawh sal uh si” tiah Pope Leo in a sim.
Pope Leo cun 1965 ih Vatican Council II nak ih an suah mi Gaudium et Spes (lungawinak le ruahsannak) ti mi capi sung ta zirhnak a nei. Himi zirhnak sung ah hin, “innsang ih zatlang hnatuan cu “minung sinak thuk le kau ih zirnak tlawng inn ti mi le senpi pawl (society) ih hramthawhnak a si “ tican a si. Cule ‘senpi hrang ih tuanvo nei tu’ , a hleice in “cozah lam le nunphung lam ih tuanvo nei tu pawl in” cui innsang le thitawknak ih thatnak/harhdamnak hrang ah hlawhtling zet in an tuanvo kha an tuan ding tin a sim. “Hi hi a hlan hnak in thupi zet ih tuan ding mi a si”tiah Pope in a sim.
Kawhhran in innsang ih a thupit dan le a man/hmual neih dan zia kha thaten a zoh ringring ti cu, a dang Pope pawl ih zirhnak pawl kan vunzoh tik ah kan hmu thei tiah Pope Leo in a sim. Hi mi Gaudium et Spes ti mi capi kan zoh tik ah, “tu laifang ih kan buai pi bik mi” innsang le thitawknak hi thupi zet in a zirh a si. Ziang ruangah tile “minung le mi pakhat ciar ih thatliannak le Khristian pawl ih thatliannak cu innsang le thitawknak ihsin a ra suak mi cui senpi ih a that dan zia dinhmun thawn a pehzom aw mi a si.
Gaudium et Spes capi cun, thitawknak cu “innsang nun le duhdawtnak ih pehzomawk nak” a si ti mi ruahnak thar a run phorsuak a si tin Pope in a sim. Cui thitawknak ti mi cu “nupa pawl minung cangvaihnak thawn pakhat le pa khat pum pe aw in an cohlang aw” ti mi a si. Cu tin pakhat le khat pumpek aw in an ni cu pahnih silo in pumkhat ih an can nak hi nupa sinak ih an duhdawtawk nak le an lungrualnak hrang ih a tul bik mi a si. Cutin, fate an hun neih tik ah an cawm ding dan pawl kha felfai ten an hmu fiang. Khrih ih a kawhhran a duhdawt vek in nan ni nupa pawl khal nan duhdawt aw ding tin Pope Leo in a sim.
Cuihnu ah, Pope Leo in Nupa duhdawtnak ti mi cu” tisa duhnak lawng a si lo” tin a sim. Innsang nupa duhdawtnak cu “an pahnih ih thinlung duhnak za ten a tel. An thinlung sung ihsin an dudawtawknak cu pakhat le pakhat par ah nem te ih an pehtlaihawk nak ah a lang tin a ti. Hi duhdawtnak cun, “ minung sinak ih a bangrep aw mi” nunau le mipa cu a kop awk ter hnu ah an nunnak hmuahhmuah ah a um cih ih “ innsang thawn pehpar aw mi an um dan pawl” ah hmuh theih a si tin a sim.
Hi mi thusim mi cu Vatican news sung ihsin kan lak mi a si.
Crd: Vatican News
