Pope Leo XIV in a simnak ah Confrimation Sacrament ( Chrisma tha peknak) ihsin kan ngah mi Thiangthlarau cu Jesuh Khrih kha thlundingah thazaang a pek thu sim. ( May 16, 2026)
Pope Leo XIV in Genoa Archdioces in mino 1000 hrawn Chrisma thapeknak (Confirmation) an cohlan hlan ah Thiangthlarau ih Laksawng a si mi “tuartheinak” kha a hleice in thupit dingah a rak forhfial. Cutikah an zumnak kha bangran ten nungin zirh a thei ding thu a rak sim. Pope in zumnak ti mi cu mah lawngih nun a si lo. Nuntlang ding a si tiah a rak sim ih thianrual tha le kiangkap venghnen dintlangnak cu Jesuh ih dungthluntu dinhmun in tuartheinak thawn zumnak kha nunnak lamzin pakhat asi thu khal arak sim.
Italy saklam ih um mi Genoa Archdiocese ih Catholic mino zumtu mipum 1000 hrawng cu Rome ah Rome ih khawm an zawhnak ah Pope Leo XIV in Zarhte ni ah an mah pawl thawn tonnak a nei ih Khrih ih dungthlun dingah an mai duhnak kha tha a rak pe.
Hi Sacrament cohlan cu ziangtluk in a tha ih a mawi” tiah Pope Leo XIV in a rak sim. Thiangthlarau Pathian thawi khahnak cu kan mah pawl kha thinthathonak, thazaang le Jesuh Khrih ih duhnak thlun theinak a pe a si. Pathian kha “Yes” tiah a titer thei ih tihphannak um lo in raltha zet ih a dungthlun dingah in cang ter asi. Jesuh thawn in hla ter duh tu khawvel ah zumnak thawn in nungter a si” tin a rak sim.
Pope Leo in hmaikar Zarhpi ni May 24 ni hi Pentecost Sunday a sithu khal a rak sim. Cui niah Pawlpi in Thiangthlarau a rak cohlang tu a hmaisabik dungthluntu pawl ih hmuhtonnak kha in mangter ih Pathian ih duhdawtnak kha an rak thannak a thawhnak a sithu khal mangsal in a rak sim.
Pope Leo in asimnak ah Confirmation a cohlangtu ding mino pakhat ciar cu Pawlpi ih mission ah a teltu pawl si dingah kawh nan si ih rualpi pawl le maisung pawl hnenah “ Nan sungih a nungtu Thiangthlarau” kha tetti khan dingah thla mi nan si tiah a rak sim.
Khawmzawhnak in nan mai parish pawl ih nan tlunsal caan ah Pope Leo XIV in mino pawl hnen Biakinn sungih cangvaihnak a phunphun pawl le thil ti theinak caantha pawl ah tel dingah a rak sawm ih kingkap veng hnen sungah zumnak in hmun khat ten nung thei dingah a rak forh fial.
“Hi mi cu a thupi zet a si” tiah Pope Leo XIV in a rak sim. “nanmah pakhat ciar khal Pathian hnenah thukam dingah, hi thubawhcatnak tuah dingah a tul ih Bawipa ih rual pi pawl, a dungthlun tu dinhmun in le missionary dinhmun in pehbet in nung dingah a duh thu, zumnak ah tuar theinak thawn pehbet in hmun hnget dingah a duh thu pehbet in arak sim. Hi mi a rak siartu zate parah Pathian thlawsuahnak um hram seh. Hi mi thuthang cu Vatican thuthang in a tawizawng in kan ngan mi asi.
