Pope Leo XIV in Angelus thlacamnak hmun ih a thusim mi ah, kan nunnak le kan leilung pi thleng dang lam ter theinak ding ah Khrih thawn kan bulpak pehtlaihawk nak thansoter ding hi a thupi tuk tiah a sim, cu vek ih kan tuah tik ah a cancan ah cun mai theihlo mi lamzin ih feh rero vek tla a bang men thei.
“Caan khatkhat ah cun, Christian zumnak hi, kan theih mi lawng ah kan lung a kim, a tlangpi thu ah mitam sawn ih ruahnak a silo le kan hnen ih in pek mi thil pawl ah, a tha bik tin tumtahnak thinlung thawn tla kan lung a kim thei,” tiah Pope Leo in a ti.
“Asinan Jesuh cun a mah thawn nel aw sinsin thei ding in le, mi tongaw pek vek ih tonawknak ihsin a mah thawn rualpi si ding ah in ko”.
Ziangtinkim ka thei thluh ti ruahnak thinlung nehtheinak
Pope Leo XIV cun tuini zarhpini ih kan siar mi Gospel Matthai sung ta thu sim in Jesuh cun a dungthlun tu pawl kha “nan ni teh kei hi zo ka si tin nan ti” tin a sut. Zumnak ti mi cu Pathian ih thuthangtha hawl ring ring ding mi hnatuan a si ih, cuti ih hawlnak in “kan mai hril mi kan nunnak le kan ruahdan, kan zumdan kha melh aw ding in kan rem thei ding” ruang ah “hi thusuh nak hi a dungthlun tu pawl lawng si lo in kan mah pakhat ciar hrang khal ah a tha mi suhawk nak a si” tin Pope in a sim.
“Hiti lawng in kan zaten ziang tikim ka thei thluh ti thinlung kan neih mi le kan zumnak kha tuah menmen ti ih kan ruahnak kha kan neh thei ding” tin a sim bet.
Kawhhran le mai bulpak nunnak ah mai zawh dah lo mi lamzin thar ih fehnak
Nitin te’n Khrih thawn kan pawlkomawknak tharthawhsalnak cun “kan theihdah lo mi lam zin pawl thlun in, kan thinlung sung ih kan ruahdah mi thawn a dang aw mi kha hril ding in in dil a si” tin Pope Leo in a sim. Himi cu “bulpak khualtlawn nak le kawhhran khualtlawnnak hrang khal ah a dik mi a si”. Cun “thlaraulam kilkhawitu ding hrilnak hrang khal ah” a dik mi a si.
“Kan tuah kel te tuah rero men ih lungsi ih um ding” cu a tha lo tin ralrin nak a pek, cun mah le mah kha hi thusuhnak pawl tuah ring ring ding in a forhfial. Ka hrang ah Bawipa cu zo a si? Ka thei ngaingai maw? Tuisun siarmi thuthangtha in ziang mi I ngen? Khui lam ah fehding ti le ziang tuah ding ah I ko?
Nitin kan nunnak ah duhdawtnak in pe tu Jesuh Khrih hmusuak tu
Pope cun kan hrang ah Jesuh cu zo a si ti le nitin kan nunnak ah ziang a lang ter ti mi thusuhnak pawl cu “A hleice in Gospel thuthangtha kan ruah le thla kan cam tik ah a suak” tiah a ti.
Sihman seh la, Pope cun “hliamhma tuartu le bawmtul mi unau pawl kan ton tik ah le midang thawn kan pehtlaihawknak le dinhmun pawl kan thinlung sung ah nasa tak ih ruah tlak ih a rak um tik ah khal cui thusuhnak cu a ra suak thotho” tin a ti.
“A tawizang ih kan sim a si ah cun, nitin kan nunnak ah Jesuh cu a thupi zet mi pawl sim tu le tuantu a si ti mi thuanthu ih theihtlak lawng maw a si, a silole Pathian ih duhdawtnak ah in hruai tu ding le kan leilung pi le kan nunnak thleng ter ding ah ti ih thlah mi Pathian ih fapa Khrih ha a si ti mi kha kan hmuthei” tin Pope in a sim.
Hi mi cu Vatican news ihsin kan lak mi a si.
