Pope eLeo XIV in Pentecost Puai ni ah “Paraclete” ti khawh mi Thiangthlarau cu minung pawlih thinlung sungah tleunak a pek ih in humhim a si tiah sim. (May 24, 2026)

Thiangthlarau Pathian ih thuneihnak in kan sim mi pawl cu lun, gawinak le ruahsannak thawn a khat a si. Ziangah tile kan mah pawl cu leilungpi a thar ih sersiamnakah, Leilungpi ih tleunak le cite kan si. Pope Leo XIV in St. Peter Basilica ah Zarhpi ni zinglam ih tuah mi Pentecost caanserh Missa ah hi tivekin thazaang peknak a rak sim ih Easter tikcu caan cu hi a sunglawi mi caanserh ah a famkim thu a rak sim.

Pope Leo XIV in hi ni ih Gospel thuthangtha kha mangsal in a sim ih dungthluntu pawl pawl cu tihphannak ruangah inn khan par ah sangka khar in an rak um thu a langter. Asinan Jesuh cu Sangka an khar konan an laifangah a thleng ih an mah lungawi ternak thawn a khah ter.

Khrih cu a mai tuahnak pawl thawn “nan hnen ah daihnak um ko seh” tiah a ti ih cuve ten Thiangthlarau kha Dungthluntu pawl parah a burh a si tiah thupit in a rak sim.

Pope Leo in Thiangthlarau cu a dungthluntu pawl in an nunram ah mangbangza thlengawknak tumpi pakhat a can ter thu kha a sim hnuah cui Thlarau Thiangthlarau cu tui ni khalah pehbet in a tuan rero thu a rak sim.

Pope in Pentecost cu “Paschal” puaipi khat a si ih “Khrih ih taksa asi mi Pawlpi ih Puai pi”a si tiah thupit in a rak sim. Cui Khrih ih taksa cu a thlawsuah nak thawngin kan zaten a aiawh thu khal a lang ter.

Pope Leo XIV in Pentecost cu “Paschal” puai pakhat a si ih a zaangfahnak thawngin kan zaten a tel mi Khrih ih Ruangpi puai” a si tiah thupit in a rak sim. Hi a thuk mi biaknak lam thuthuk tuahnak ah Pope Leo in Thiangthlarau ih hmuh sak mi phunthum kha thupit in a rak langter.

Apakhatnak ah “remdaihnak ih Thiangthlarau”

Apahnihnak ah “mission hnatuannak ih Thiangthlarau”

Apathumnakah “thudik ih Thiangthlarau” tiah a rak sim.

Apakhatnak a si mi “remdaihnak ih Thiangthlarau kha thupit ih a simnak ah Pope Leo XIV in Khrih ih Paschal thuthuk a si mi Pawlpi ih thilcang mi ah Thiangthlarau cu Pathian le minung karlakah remdaihnak kha a dinsak sal thu a rak sim. Cuiremdaihnak kha kan thinglung sungah a burh ih leilung hmuntin ah khal a karhzai ter tiah sawhkhih in a rak sim.

Thiangthlarau in mission hnatuannak lam ih a simnakah Pope Leo XIV in Thiangthlarau cu “Khrih ih a nung mi duhdawtnak” a si mi kha kan sungah a khah ter ih kanmah kha thangphok in tha in pe ih mission hnatuannakah hnget zet in in bawm a si tiah a rak sim.

Pope Leo XIV in Pentecost niah Dungthluntu pawl cu Thiangthlarau ih thuham thawn Jesuh Khrih ih thu thannak an rak thawh thu mangsal in a sim. Amah in Thiangthlarau ih ahmaisabik tuahnak cu kan sungah zumnak in pe ih cui zumnak thawngin “Jesuh cu Bawipa a si” tiah in thanter thei a si tiah a rak sim.

Pope Leo XIV in zumtu zate cu a ngaingaiah “Gospel thuthangtha ih hnatuan pi pawl” a si thu thupit in a rak sim. Cuihleiah “Pawlpi zaten cu Gospel thuthangtha ih a thupibik ih tuantu kan si ih tetti khan ih humhim tu lawng a silo” tiah telh in a rak sim.

Acemnakah Pope Leo XIV in Paraclete (Thiangthlarau) cu Gospel thuthangtha kha a donkham ter mi zate in kanmah kha in humhim a si tiah a rak sim. Cumisungah pawlkom ih lam tan hleicenak, titerawknak, le Gospel thuthangtha ih tleunak a phen ter mi santiluan ih zir in lam palhnak pawl kha a tel tiah a rak sim.

Curuangah Pope Leo XIV in “Pathian ih in pek mi thudik cu miphun zate hrangah luatnak a can ter mi thucah pakhat in a um ih nunphung tin ih a sunglam in a thlengter thei mi thuthangtha a si” tiah a rak sim.

Cuihleiah Thiangthlarau cu veikhat lawngte burh a si lo ih ziangtik lai caan khal ah pehbet in in burh a si tiah thupit in a rak sim. Cuvek thotho in Pope Leo XIV in Thiangthlarau cu Confirmation (Chrisma thapeknak) ah zumtu pawl kha tetti khan dinhmunah a dinsak thu a rak sim. Cuihleiah Holy Orders Puithiam cannak khal ah Pathian ih miphun hrangah a riantuan tu pawl le Tuu khal tu pawl kha a rak din a si tiah a rak sim.

Pope Leo XIV in a cemnak ah Dungthluntu pawl kha an ral a tha tertu thlawhsuah kha Thiangthlarau in tuini le a kumkhua in kan sungah in retsak hram seh tiah thla a rak cam. Hi thlacamnak cu Bawinu ih thlacamsaknak thawngin cang hram seh tiah zaangfah a rak dil. Hi mi thuthang cu Vatican thuthangin a tawizawngin kan ngan mi asi.