Pope Leo ih Vocations Day ni hrang thu cah: Pathian ih laksawng kha thinlung sungah hawl in tong dingah tiah a si. (March 25, 2026)

Pope Leo XIV in a reihla, n ih tuah ding mi Vacations ni hrang thlacamnak ni (World Day of Prayer for Vocations) hrangah a thucah mi a langter ih tuikum ah cui ni cu April 26 Zarhpi ni ih tuah ding a si. Cuihlei ah Pathianih kawh)nak pakhat ciar cu Pawlpi hrangah siseh, lungawi ten a cohlangtu pawl hrangah siseh tahthim thei lo mi laksawng pakhat a si”tiah thupit in a rak sim.

Pope Leo XIV in a vei 63 nak Vacations ( Pathian ih kawhnak )hrang thlacamnak ni hrangah thuthan a rak suah. Tuikum ah cun cui ni cu Easter Thosal tikcucaan ih Zarhpi vei 4 nak a si ih April 26 ni ah tuah a si dingih cui ni cu Good Shepherd (Jesuh Khrih ih Tuu Khal puai ni) khal a si.

Pope in cui ni cu “thlawsuahnak thawn a khat mi caantha pakhat a si ih Pathian kawhnak kha thinlung sungih a san hawl tlang thei dingah caan tha pakhat asi. Cui khawhnak cu kan thinlung sungih a thuhnak ah a parih a suak mi Pathian ih pek mi tin kan hmu thei” tiah a rak sim.

Cuihleiah Tuukhal tha a si mi Bawipa in kan mah cu lam in hruai ih nunnak lam zinah a mawi mi lamzin kha hawl tlang thei dingah caan tha pakhat khal a si ti khal in a rak sim.

John Gospel thuthangtha ah Jesuh in a mah le amah kha Tuu khal tha tiah a langter ih a mai Tuu pawl hrangah a mai nunnak kha pe dingah man cia in a um thu a simnak khal in mangter asi. Cui mi thawngin Pathian ih duhdawtnak khal a langsar ter a si.

Pope Leo in “amah in kan mah pawl cu a hnen ah ra dingin in sawm tu Tuu khal tha a si ih a mai kilvennak in a dung kan thlun tikah nunram cu a mawi ngaingai thu a langter” tiah thupit in a rak sim. Cuihlei ah hi mawinak kha thei thei dingah ruahthiam nak le thinlung sungih ngaihsak nak a tul thu khal a rak lang ter. Cu pawl cu “a mah cohlang thei tu, a ngai thei tu, thlacam thei tu, Tuukhal tha ih zohnak kha a cohlangtu pawl lawng kha a mah ka zum, a mah thawn nun lawngah nun ram a mawi thei” tiah zumnak famkim thawn kan sim thei tin a rak sim.

“A hleice ih a danglam mi” tiah Pope Leo XIV in a rak simnak ah “amah dungthluntu kan si tikah mi pakhat cu a mawi ngaingai ih a mawinak in kan mah pawl kha thinlung in thleng ter” tiah a sim. Cuitlunah a mah in  St.Augustine ih hmuh ton mi kha in mangter tiah a rak sim. Augustine cu a mai mino nunram ah a sualnak pawl le a mawhnak pawl kha a theih ngah thluh hnu lawngah thimnak sungin a mah kha lam a hmuhtu Pathian ih tleunak ih mawi zia kha a hawl suak thei asi.

Pope Leo in a simnak ah thlacamnak le daite umnak parih a hrambun mi cuvek ih pehtlaihawknak kha thu ngai thlak ih kan nunpi tikah Pathian ih kawhnak ti mi laksawng cohlang dingah le thatho zet in lehrul thei dingah kan mah pawl kha lam in on sak a si tiah a rak sim.

Sunglam nunram kha ngaihsak ih kilhimnak kha hram a bun tiah Pope Leo XIV in a simnak ah “Pathian ih kawhnak hnatuannak (vocational ministry) kha thupit in ruahsal tikah evangelization hnatuannak hrangah kan mai thukam pawl kha a thar in tuah a tul a si ti khal in a rak sim.

Cuitlunah Pope in “Innsang , Parish, Bishop pawl, Puithiam pawl pawlkom, religious pawl, deacon pawl, Pathian thusim tu saya pawl le zumtu zaten kawhnak ti mi laksawng kha cohlang thei dingah thupit in hrambun thei dingah, kilhim thei dingah le lam hmuh thei dingah le tuahthiam thei dingah tampin tel dingah a rak sawm. Hi tivekih kan ti le cui laksawng pawl cu a tam dingih rah tha a rah thei ding a si.

Pope Leo XIV in a sim mi ah Bawipa in kan mah pawl in thei ih a khat mi duhdawtnak thawn in zoh ih kan thinlungah tleunak in pe a si. A ngaingai ih kan ti a sile vocation ti mi Pathian ih kawhnak tin ah duhdawtnak a si mi Pathian kha theihnak le hmuhtonnak in a thok a si. Bawipa in kan mah pawl cu thukzet in in thei ih kan Lu ih samphangkhat khal a siar theh a si. Minung pakhat cio khal ah a hleice  mi thianhlimnak le tuahnak lamzin pakhat ciar kha in remsak cia a si” tiah Holy Father in a rak sim.

Pope Leo XIV in mino pawl hnen Bawipai aw kha ngai dingah a rak sawm ih Bawipa cu a famkim ih a rahsuak mi nunram pakhat ah nan mah kha a lo kawh thu a rak sim. Cuihlei ah mai ngah mi laksawng pawl le thiamnak pawl kha hmang dingah, mai sinak le sambaunak pawl kha Khrih ih huham a nei zet mi Thinglamtah thawn kom dingah khal tha a rak pe.

Mino pawl in Bawipa an theih theinak ding hrangah Eucharistic adoration (Bawipa thilesa upatnak) nei dingah, Pathian ih ttongkam kha zumnak thawn ruat dingah le nitin nunram lam tluanah a tak in nunpi dingah, cui hleiah Pawlpi ih a thianghlim mi Sacramentu pawl thawn Pawlpi ah thatho zet in tel dingah khal ruahnak a pe.

Pope Leo in a simbet mi cu Jesuh thawn rualpi a si mi a nai aw zet mi pehtlaihnak ihsin mino pawl cu mah le mah kha ziangvekin ka pe aw ding ti mi an hawl thiam thei dingih cu mi pawl ah kutsihnak nunram, Puithiam nunram, Brother nunram lole consecrated life pawl ih sin a cang thei a si.

Pathian ih kawhnak nunram tinah Pawlpi hrangah siseh, cu mi kha lungawiten cohlangtu pawl hrangah siseh tahthim thei lo mi laksawng pakhat a si” ti khal in a rak sim.

Pope Leo in Pathian cu khuathim sungih kan um lai caan khal ah in hrial lo ih a mai tleunak thawn khuathimnak dinhmun kan ton tin ten in sial sak thu mangsal in a sim. A thiangthlarau ih tleunak le thazaang thawn hniksaknak pawl le a harsa zet mi karlak khal ah tiah Pope Leo in a rak sim. Pathian ih kawhnak cu a thanglian ih kan mah in ko tu ih mawi zia kha famkim le a langsar thu kan hmu thei a si. Cui mawinak cu kan hriamhma pawl le kan palhnak pawl a um ko nan rinfelnak le zumfelnak in kan langter mi mawinak a si.

A netnak ah Pope in Pathian ih laksawng pawl cu thinlung sung ih cohlan thiamtu, daite in thlacamnak thawn ngai thei nak in Bawinu Maria in nan lam tluan ah lo kilhim in lo veng hram seh” tiah zaangfah dil phah in a rak sim asi. Hi mi thuthang cu Vatican thuthangin a tawizawng in kan ngan mi asi.