Tlangak le Ngathur ih zir ding mi thuanthu tawi.
Veikhat laiah khua pakhat kiangah thingkung pi pakhat a rak um an ti. Cui Thingkungah Tlangak pakhat le Ngathur pakhat cu rualpi ah an kaiaw ih an rak um pan lo maw.
An pahnih cu zinglam tinten rawl hawl in an tlan ih zanlam khuathim zikah Thingkung pi kiangah cun an ra kir sal ih an riak theu.
Ngathur in Leilet Lo le Tiva ah nga a hawl vekin Tlangak cu Khuasungah feh in khua mi pawl in Nisa ih an pho mi Nga ro le sa pawl kha minung pawl an dem caan le a cuk ih a rak ei sak theu.
Veikhat hnih Tlangak cu innsung tiang lut in a fir caan tla a um. Ngathur cu veikhat veihnih Nga a hmu lo ih a mithmai sia thawn a kir sal theu. Cu mi cu Tlangak in a hmu theu. Cutin nikhat cu zinglam rawl hawl an feh hlan ah Tlangak in Ngathur kha hi tin a ti. “ka rual Ngathur nang ka lo zoh le ka bang theu rawl khal thaten na ngah lo ih na ngahnakah na hnawng khal a sau thluh vek a bang tiah a ti pan lo maw.
Keimah in zoh hnik hi khua um sung cu ka hrangah rawl ah phan ding a um lo, bang khal ka bang lo ding keimah in thlun awla keimah vekin rawl hawl aw tiah a ti.
Cutikah Ngathur in “ka rual Tlangak na pumcawmnak cu tih a nung tuk. Nang cu midang thilri fir in na ei tikah na thinlung a nuam lo phuhrungaw ih um ringring a si. Kei cu rawl ka hawl mi cu a cancan ah ka khop lo nan tih a nung lo. Thinhna a ngam. A ngaingai ah cun nang kha keimai rawlhawlnak ah I thlun le a tha” tiah a si.
Cutikah Tlangak in “aw ka rual I tlun duh lo khal le um men aw nangmah vek cun bang tuar in ka ei thei lo tiah a ti ih khuasung lam ah a zam. Ngathur khal sim a theih lo ruangah a mai rawl hawl dingin tiva lam pan in a zam ve. Cuti cun zanlam a rung kim ih Ngathur cu Thingkung pi kiangah a ra zam sal. Culai ah Tingkungpi hnuai ih Caw khal tu pahnih ih ttong cu a rak thei. Cawkhal pakhat in a sim “ka rual tuisun Tlangak pakhat Kuahli thawn ka sai ih veikhat ah a thi cih. Khai Tlangak cu kan inn ih poh mi Nga pawl a ra fir ih a einak a rei tuk zo. Tuisun cu keimah thawn kan tongaw ih ka sai cih” tiah a ti.
Cutik ah Ngathur cu a rualpi Tlangak hrangah a thin nuam lo zet in a um. Ralrinnak ka pe ko nan si a ngai duh fawn lo tiah a rual Tlangak hrangah a thin nuam lo zet in a um.
Hi thuanthu ih in zirh mi cu a dik lo zawngih kan tuah mi pumcawmnak in thinharnak in pek vekin a tuisan le nehhnu san hrang khal ah a tha lo. A dik zawngih pumcawmnak hawl nak in kan khawh kan hmuh rep lo hman ah thinharnak a can ter lo ih thin hnangamnak a thlen ter sawn a si. A dik zawngih kan ngah mi thilri pawlkhal in hnget ter sawn a si.
