161. Ziangruangah Pawlpi cu Pakhat a si?
Pawlpi cu pakhat a si. Ziangruangah tile Pawlpi ih hram thoknak cu Bawi Pathum Pathian pakhat ih hmunkhat sinak in a ra. Pawlpi dintu le Pawlpi ih lu a simi Jesuh Khrih in milai pawl ih pawlkom awknak cu ruangpi pakhat ah a cang ter a si. Thiang Thlarau in Khrih thawn kom aw dingin zumtu pawlcu hmunkhat ah a kom. Pawlpi in zumnak pakhat, sacrament nunnak pakhat, dungthluntu pawl thawn pehzomawknak pakhat, rinnak pakhat le duhdawtnak pakhat lawng a nei.
162. Khui tawkah pakhat lawng a si mi Khrih ih Pawlpi cu a um?
Pakhat lawng a si mi Khrih ih Pawlpi cu, hi leitlun ah, Catholic Pawlpi sungah a um. Cuih Catholic Pawlpi cu Piter ih can ai awh tu pawl a si mi pope pawl le bishop pawl in an uk. Hi Catholic Pawlpi hnen lawngin rundamnak lamzin famkim kan ngah thei a si. Ziangruangah tile Bawipa in Thukam Thar ih laksawng pawl cu a dungthluntu pawl hnen lawngah a ap. Dungthluntu pawl hotu cu Piter a si.
163. Catholic a si lo mi Khristian pawl cu ziang tin kan ruat ding?
Catholic Pawlpi a si lo mi Khristian biaknak sung khal ah thianhlimnak le thuhman thawn pehpar aw mi tampi kan hmu thei. Hi thlawsuah pawl cu Khrih hnen ihsin a rami an siih hmunkhat si thei dingin lamzin ah an cang. Tihnimnak ruangin hi Catholic a silo mi Khristian pawl cu Khrih ah pehzom an si. Curuangah Catholic Pawlpi in hi zumtu pawl cu “kan u le nau” an si, tiah a cohlang.
164. Zumtu pawl hmunkhat ih cang thei dingin ziang kan ṭuan ding?
Zumtu pawl hmunkhat ih cang thei dingih duhnak kan neih mi cu Khrih ih laksawng le Thlarau ih kawhnak a si. Himi cang suak thei dingin Pawlpi a ṭul ih mimal ciar ih thinlung thlengnak, thlacamnak, pakhat le pakhat theihthiam awknak le Pathian thu relkhawm tlangnak pawl an ṭul a si.
165. Ziang tivek in Pawlpi cu a thianghlim?
Pawlpi ih hramthawhnak cu a thianghlimbik mi Pathian a si ruangah Pawlpi cu a thianghlim a si. Khrih cu Pawlpi a thianhlim theinak dingin le Pawlpi cu thianhlimnak ih hrampi a si theinak dingin amah le amah Pawlpi hnenah a pe aw a si. Thiang Thlarau in duhdawtnak thawn nunnak a pek. Pawlpi sungah rundamnak lamzin famkim zet in kan hmu thei. Thianhlimnak cu mikip in Pathian hnen ihsin kawhnak kan ngah mi a si ih ziangkim kan ṭuannak ih tumtah mi khal a si. Pawlpi in mi Thianghlim Mary le siarcawklo mi thianghlim dang pawl cu sungtel pawl lak ih tel ve tu an si, tin a sim. Cuih hlei ah hi Thianghlim Mary le mi thianghlim pawl cu zohṭhim mi le thlacam saktu pawl an si, tin a sim bet. Pawlpi ih thianhlimnak cu sual nei mi kan si ih thlengawknak le thianhlimnak kan ṭul a si ti thei aw tu, zumtu pawlih thianhlimnak hrampi a si.
166. Ziangruangah Pawlpi cu mi hmuahhmuah thawn a pehparaw a si, kan ti?
Pawlpi cu mi hmuahhmuah thawn a pehpar aw a si. Himi thu thawn pehpar aw in Antioch khua ih um mi Mithiangthlim in hi tin a sim: “Khrih Jesuh ih umnak ah Catholic Pawlpi a um”. Pawlpi in zumnak ih famkimnak a phuang; rundamnak lamzin ih famkimnak a ṭuan ih Khrih in leitlun miphun zakip hnenah rundamnak hnaṭuan dingin a thlah.
167. Diocese kan timi teh mi hmuahhmuah thawn pehpar awknak a nei maw?
Diocese zaten mi hmuahhmuah thawn pehpar awknak a nei mi an si ṭheh. Diocese cu zumnak le sacraments pawlthawn Khristian pawl le bishop pawl thawn kom aw ih tuah mi a si. Bishop pa cu dungthluntu pawl thawi pehzom awknak thawn bishop cannak ngah mi a si.
168. Catholic Pawlpi kan timi cu zo an si?
Leitlun mi zaten phun dangdangin Pathian ih milai pawl ih Cathlic pawlkomnak ah an tel thluh a si. Hmansehla tling zet le famkim zet in Catholic Pawlpi ih a tel tu pawl cu Khrih ih Thlarau an co ih zumnak thukamnak tuahnak in siseh, sacraments pawl in siseh, pawlpi ih uknak le hmunkhat sinak pawl thawn Pawlpi sungah an um a si. Tihnimnak an ngah nan Catholic Pawlpi sungah famkim zet ih a lut hrih lo tu pawl khal Cathlic Pawlpi thawn pehzom awknak an nei a si.
169. Cathlic Pawlpi le Jew (Israel) pawl cu ziang pehzom awknak an nei?
Catholic Pawlpi in Jew mi pawl cu Pathian in a maih Ṭongkam co tu dingah mi phundang pawl hlan ah a hril a si timi cu a cohlang ih Jew mi pawl thawn pehzom awknak kan nei a si tin a sim. Jew pawlin “fate sinak, thawm huham, thukam pawl, daan peknak, biaknak, thuthiam kamnak, pupa sinak, an miphun le hnam ah Khrih sinak pawl an co a si” (Romans 9:4,5). Jew pawlih zumnak cu, Khristian a si lo mi biaknak vek siloin, thu tiamkamnak hlun lai ihsin Pathian ih thuphuan lehsal nak ah a rak um zo.
