Catechism of the Catholic Church sungta kan run lo hlawm

153. Ziangruangah Pawlpi cu “Pathian ih milai” pawl an si?

Pawlpi cu “Pathian ih milai pawl” a si. Ziangtuangah tile Pawlpi in leitlun minung pawl thianghlim ter dingin le run dingin Pathian hnenah a dil a si. Cuvek ih thla a cam tikkhal ah Pa le Fapa le Thlarau ih pumkhat sinak in leitlun mi pawl pumkhat ah a cang ter.

154. Pathian ih milai pawl ih lamdannak le hminsinnak pawl cu ziang an si?

Khrih zumnak le Tihnimnak ihsin mi pakhat cu Pathian ih milai pawlkom sungah sung tel ah a cang a si. Hi mipi pawlih:

• Hramthohnak cu Pa Pathian;
• Hotu cu Jesuh Khrih;
• Upattlak an sinak le an zalennak cu Pathian ih  fale sinak;
• Thukham cu duhdawtnak daan thar;
• Hnaṭuan mi cu leilung ih ci le leitlun ih tleunak;  le
• Tumtah mi cu hi leitlun ihsin a thok zo mi Pathian ih Uknak Ram a si.

155. Ziang tivek in Khristian pawlin Khrih ih hnaṭuan  phunthum: Puithiam, Profet le Siangpahrang ah an tel ve?

(1) Pathian ih milai pawl cu Khrih ih puithiam hnaṭuannak ah Tihnimnak in Thiang Thlarau ih hnaṭuannak thawn an tel ve a si.

(2) Khrih ih prophet sinak ah zumtu pawl in a cuangce zet mi zumnak kaih ngetnak, thuk sinsin ih theihnak le tetti khan nak in an tel.

(3) Khrih ih siangpahrang sinak ah zumtu pawl in, leitlun siangpahrang asinan amah le amah mi hmuahmuah riantu ih amah le amah a tuah aw tu Jesuh Khrih dungtlun ih, hnaṭuannak in a hleice in mifarah le mizonzai pawl kilkhawinak in Khrih ih siangpahrang sinak ah an tel ve a si.

156. Ziang vek in Pawlpi cu Khrih ih ruangpi a si?

Thiang Thlarau thawng in a thosal mi Khrih in amah zumtu pawl cu a maih hnenah a kom hai a si. Hi ti vek in, Khrih zumtu pawl cu a hleice in Missa sungah Khrih thawn siseh, cun, duhdawtnak hnaṭuannak in an mah le an mah siseh, an kom aw a si. Pumkhat a si mi Pawlpi ah an cangih pumkhat sinak cu hmuntin ramtin ihsin a si mi zumtu pawl le an hnaṭuannak in an theithei a si.

157. Pawlpi ih (ruangpi ih) lubik cu zo a si?

“Pawlpi cu Khrih ih ruangpum a si ih Khrih cu Pawlpi ih lu a si” (Kolose 1:18). Pawlpi cu Khrih ihsin Khrih sungah le Khrih ih hrangah a nung a si. Mi thianghlim Augustine in Khrih le Pawlpi in “Khrih pumpi” an tuah a si, a ti. Cun mi thianghlim Thomas Aquinas in “hotu le sungtel pawl in mangbangza mi pakhat an cang ter a si” a ti.

158. Ziangruangah Pawlpi cu Khrih ih monu a si tiah kan ko?

Pawlpi cu “Khrih ih monu” a si tiin kan ko. Ziangruangah tile Bawipa in amah le amah Pawlpi ih “Pasal” ka si tiah a ti (Mk 2:19).  Bawipa in Pawlpi cu a duhdawt zet ih kumkhua ih a hmun mi thukamnak thawn pehtlaihnak a tuah. Pawlpi cu a thisen mankhungih thiangfai ter dingin Khrih cu Pawlpi hrangah amah le amah a pek awk a si. Pathian ih fate pawl hrangih Nu si dingin Pawlpi cu Khrih in a thianghlim ter a si (cf. Efesa 5:26).

  “Ruangpi” timi in hotu le sungtel pawlih hmunkhat sinak a langter ih “monu” timi in pakhat le pakhat ih peh thlaih awknak ih danawknak a khih hmuh a si.

159. Ziangruangah Pawlpi cu Thiang Thlarau ih biakinn a si, tiah kan ti thei?

Pawlpi cu Thiang Thlarau in biakinn a si tiah kan ti thei. Ziangruangah tile Thiang Thlarau cu ruangpi a simi Pawlpi ih sungah a um. Cun Thiang Thlarau cu Pawlpi ih lu le sungtel sungah a um. Thiang Thlarau in Pathian ih Ṭongkam in siseh, sacraments pawl in siseh, thianhlimnak pawl siseh, laksawng phunphun in siseh Pawlpi cu duhdawtnak sungah a din a si.

160. Laksawng sunglawi cu ziang a si?

Laksawng sunglawi kan timi cu Thiang Thlarau ih laksawng hleice a si. Hi laksawng hleice cu midang ih ṭhathnemnak hrangah siseh leithlun ih ṭulsamnak hrangah siseh Pawlpi dinsuahnak ding hrangah siseh mimal pawl hnenah Pathian in a pek hai.