Mahlemah rinsanawk kan ti tikah  midang ziangih siar lo ti duhsannak si lo in mai tumtah mi parah khoh zetin zuam ti mi kha kan ti duh mi a si. Leitlunah mitinkim thanso kan duh, len kan duh, mi tinkim hlawhtlin duh nak ah cun kan bang aw. Asinan mitinkim hlawhtlin nak kan ngah lo. Cumicu ziangruangah, a san bik cu rinsanawk dan a bang awk lo ruangah a si.

          A cang thei timi zumnak famkim thawn a tuah tu cu a cang suak tengteng a si. A hrek zum, a hrek zum lo vekih a tuah tu cu a hrek vial a cang ding. Zum lo lawlaw asile zianghman a cang suak lo ding. Hi leitlun ah a cang tengteng ding tiin zum nak a nei tu hrangah tuah daan tampi a um. Dungsip duh lo nak thinlung a nei tu hrangah ngah ding mi lennak a thar a thar a suak. Cuvek thinlung nei tu cu leilungpi in a theih sak. Cuvek thinlung a nei lotu pawl cu thinlung a hnget lo mi a si. Tuah ngam lo, tuan ngam lo, ruat ngam lo nak pawl cu zumnak hnget thawn an tuah ngam. leilung ih hnaihnok nak khal hnihsuah nak ti lawng in an ruat.

          Mah le mah rinsak thiamnak cu ralthatnak phunkhat a si. Hlawhtlin nak ih a hrampi tiin khal ti a theih. Mahlemah rinsanawknak a um lole hlawhtlin a theih lo. Zumawknak, rinsanawknak in tha a um dingih thinlungah thazang thar a pe. Zuamnak a thang ter. Thinlung a phur ter.

          “Leitlun ah ka duh mi ka ngah thei, ka can duh mi a cang thei, ka tuah thei” timi tong kha thinlung sungah rinawknak thawn ret aw. Cutikah umdaan, ziaza, tongkam zaten a tha ah a thleng thei a si. A tha lomi vansiat nak le farah nak khal a cem thei. Hivekih tidaan tha veikhat hman mang ih man dah lo ah cun hlawhtlin nak thawn hmai lam ih feh a har ding.

          Mai thilti thei nak rinsan in nunram ih feh nak ding a hawl tu mi pakhat cu zo hman in an dir thei lo. Amah cu tuah thei ding tiin zumnak thinlung thawn hmuh mi harsat nak tinkim pah a theih ding timi a fiang.

          “Mah le mah van siat thu, midang hnakin vansia, thiam lo” timi thinlung minute pakhat sung hman pom hlah. Ruahnak khal in hlon cih aw. Thinlung ih thanaunak pawl a rat nak cu ralrin nak thawn hnong dingah zir ding.

          Mai farahnak, vansiatnak, dinhmun thatlo nak pawl cu ziang tik hman ah rel hlah. Ngan khal ngan hlah. Himi pawl cu tih nak, tha naunak langter nak a si. Cuvekih thanaunak pawl cu malte sung harsat nak tiin ruat aw. Minung si cun lungawi dingah, hlawhtling dingah, lian dingah tiin ruat ringring aw.

          “Kei cu ka van a tha, dinhmun a tha mi pawl sungah a tel mi pakhat ka si” tiin zum aw. Ka suah caan cu a tha bik caan, ka um nak hmun cu a tha bik hmun, zohman in tuah thei lomi keimah vial ih tuah thei mi hnatuan pawl tampi a um. Cumi pawl cu hlawhtling in tuah ding, harhdamnak, fimnak zirnak le hnatuan nak ah keimah lawng ka van a tha bik tin ruat aw. Cutiin a hlawhtling tengteng mi pakhat na si ding.

          Hnatuan pakhat cu hlawhtling dingin tuah ding tiin botcat theh veten mahlemah ruahnak khal tuah nak khal hlawhtling tu pakhat vekin tuah aw. Ruahnak thawn tuah aw. Sim mi ttong, tuam awk daan zaten hlawhtling mi pakhat tiin hmu tu tin ih ruat dingin um aw. Feh nak hmun tinkim ah hlawhtling nak a keng ringring tu vekin um aw. Himi cu um hrim ih uang awk ter nak asilo. Um hrimin uang awk nak thawn a bang aw lo. Uangawk hrim nak cu asilolmi asi tiih tuahnak, a um lomi um tiih simnak, a tui ka lo forh mi cu hlawhtling duh taktak mi pawl ih thinlung ih neih ding mi, ret dingmi, sim dingmi, zum dingmi, ruah nak pek mi a si. A cang taktak mi cu mangbangza rori in hmuh a si ding. Curuangah mahlemah rinsan awk nak le zumawk nak thawn kan hlawhtling nak ding colhhmun pan cio uh si.