Mithianghlim Anselm (April – 21)

                Canterbury khuapi ih Bishop a si mi  mithianghlim Anselm cu kum 1033 ah Italy ram Aosta khuapi ah upat tlak mi innsungsaang in a rak suak. Kum 27 a ti ah Normandy khuapi, Bec ih um mi mithianghlim Benedict Siangbawi tlawng ah a rak lut. Cui tlawng ih kum thum sung tha suah ih a rak zuam hnuah Caen khuapi ih Siangbawi ah an rak hril.

                A dang Siangbawi pawl in siangbawi upa ih hril dingah a nauhak tuk lai tin an phun cair nan Anselm ih lai nat nak thinlung le a thin sau nak in a zaten a rak neh. A mah cu mino pawl zirh nak ah thluak tha zet mi a si.

                A ca zir nak ah hlawhtlin nak a um lo ruangah thinhar ih a um rero mi an inn kiang Siangbawi pakhat hnenah “Na hmuan ah thinkung pakhat ciing in a kiang ih tingkung pawl thawn na tem a si le a cerh thei lo ding” ziangvek kung ah a suak pei. Siangbawipa nang tla hi vek na si ko, na kuthnuai pawl na kil him mi a si. Nuam nak le zalen nak ziang hman pek lo in thinphang dingih na tuah mi” tiah a rak sim.

      A hmaisabik thu ruat thiam a si mi Anselm cu cui caan ih hminthang bik Pathian lam ih fimthiam nak neitu mifim pakhat a rak si ih leitlun thiamnak lam ih Pa khal a si. Mah te lawng tong nak “Morologue” ti mi ca uk ah, Pathian cu a saangbik a kumkhua ih Pathian a si thu le Pathian ih thu hla pawl le a hmin than nak pawl an rak zingzoi ih “Prologue” ti mi ca uk khal ah Pathian a um thu kha a hmin than nak fiangter nak thawn a rak hmuh. Kum 1093 ah Canterbury khuapi ih Bishop a si mi Bishop Lanfrane ih din hmun ah tuanvo lak tu ding le ai-awh tu dingah kawh nak a rak ngah a si.

Cui caan ah Pawlpi ih zalen nak hrangah  Siangpahrang thawn an el-awk caan a si ruangah  Anselm cu tu le tu ram dawi a rak tuar. Mipi lungawi nak dingah kum 1106 ah Canterbury khuapi ah a kirsal ih cui hnu kum thum ah a nun nak a rak cem a si.