Veikhat lai ah tiva kap ih thingkung pakhat ah vate nufa an um. Nikhat ah vate fa cu thingkung pakhat in pakhat ah a zam rero laiah a ruah nak pakhat a pawt ih a nu kha a sut.

          “Ka nu thingkung pawl khal a sang le niam an bang aw lo ti… kan kiang ih a tha mi a sang mi thingkungpi khal khi Tlangak dum sungkua in an luah… ka tha va nau ve ka nu” tin a ti.

          Cutikah vate pi nu khal a fa ih ttongmi cu a lung a kim lemlo ih “Ra in thlun aw” a ti ih sang pi ah a zam. Cutin leilungihsin a sang nak hmun pi an thlen tikah a fa kha hnuai a zoh ter.

          Cutheh in vate pinu in “Ka fa… thingkung zate pawl hmuh thei nak a sang ih zoh a si le an nih ih a sang nak cu a tul nawn maw si… ziangkim cu leilung ah an um thluh. Kan um nak thingkung hman a tum sawn lai a si si ka fapa … zohhnik … a par le a tek pawl an tam ih a darh aw thluh mi a tek pawl thawn a mawi tuk ka fapa. Thingkung a sang le sang lo cu kan rem thei lo. Asinan kan hmuh dan kha rem sanhnik aw… Cutikah thin hnangam nak na ngah si lo maw ka fa. Nungram ah a tul lo mi thil kha va tahthim hlah. Veikhat veihnih thinkung sang nak ih to a si le thli a hrang sinsin. Na thinhar hlah, thing zim aiih sangah zam hnik awla a ra hrang mi thli khal na thlun thei ti kha na thei ding ka fa.”

          “Cu theh in ka fa nangmah ih na hmuh nak lawngin ziang tik hmang ah thu botcat hlah. Mizate ih hmuh thei nak a sang ih zam thei ding zuam aw. A par ih sin zoh thei ding zuam aw. A hnuai ih ziang hman a si lo mi zuam awk nak men in caan a cem mi pawl, mai hneniih um mi kha kil tha lo.. midang pawl ih thu pawl lawngkha ruat ih thin thanau rero mi pawl khal an tam pi ka fa. Asinan Lothlo mi pawl in zo kha an duhdawt tin na ruat. Kan mah pawl si ka fapa… Kan mah pawl khal an mah vekin kan mawi lo kan farah. Asinan kan mah vek-aw neitu Vate pawl cu an mah pawl ai in kan mawi maw? Cu vek a si ka fa kan mah ah cah nak tampi kan nei cumi kha theih ding zuam aw.

          Mah le mah man nei in ruat aw.  Nunram ti mi cu tahthim awk ding a si lo. Pahtlang ding a si. Midang pawl ih nunnram thawn tahthim ding a si lo.. Tha hnem ding, man neih ding le mah rori ih tlunding ding a si. Ziangtikhman ah hngilh hlah ka fa…”

          Hi thuanthu ih in zirh duh mi cu kan nun ram kha a ringring ih man hla ter ding cu kan tuanvo a si. Mi dang ruangih thin beidong thin thanau nak pawl nungram sungih ret ding cu nan mai tuanvo a si lo vekin caan khal a um lo…ralring ten um aw. Ca a rak siar theutu zate parah lungawinak tampi kan nei. Nan zate parah Pathian thlasuahnak um hram seh.