Kum 50 hrawng putar pakhat siizung pakhat sungah khur phah ten a rung lut.

          A hlun zet mi Longyi a kir siapsiap mi korrang bansau kha a hruk.

          A kut thir phah thawn Siizung sangkaa ih tar mi tikect pakhat a la ih ka kiangih tohkham pakhat ah a rung to.

          Rauzet le ruahsan nak nei nawn lo mi mit pawl thawn hmailam kha a zohih veikhatveikhat keimah in zoh cingcing. In bia duh vekin a um. Curuangah keimah lam in ka bia hmaisa.

          Ka pu na rak piah aw ve maw? Siikhaan a ra piah ti thei cingin biakhmai dingdan ka thei lo ruangah cuvek in ka sut ngah pang.

          Ka pu cun a mit thil hal thawn i zoh phah in lu i sut.

          Kei cu ka rual pa a dam lo ruangah ka rak thlun. Asile ka pu ziangruangah maw? tin ka sut. Putar pa cun nat nak menmen a si a ti.

          Aw… a si.

          A damlo nak kha theih ter i duh lo ruangah tla a si thei.

          Ka pu cu Siizung hmai ih motor zinpi ih a feh rero mi motor pawl a zoh ih caan reinawn daiten a um.

          Cutheh in ka lam a heer ih damlo nak menmen a si ka tu pa. Asinan ka tuar mi nat nak cu a naa zet.

          Malte cu ka mang a bang. Ziangruangah ti ka thei duh ih keimah in ziangruangah tin ka sut.

          A mithmai malte a sen ih a kut sungih tikect te kha a zoh rero. A par ih thil cang mi pawl a ruat sal ih a riah a sia a bang. A mit thli tla a hal. Cule a nih in pehbet in tui zinglam ah ka um a nuam lo ih siikhan ka piah duh tin ka fa le pawl ka sim ih raibur menmen cu inn ih a um mi si kha ei men awla sikhaan cu paisa an dil tamtuk an ti.

          “Ka thei thiam ko ka tu pa asinan ka harhdam nak ka hna ngam lo ruangah siikhaan tal piah le a tha pei maw ti men. Kei cu pa ka sisi. Fa le hnen ihsin veikhat tal paisa ka dil hnik ding. Ka ngah lo a sile neta ka dil nawn lo ding.

          Cui paisa te ngah dingin fa le hnen ah tangdor nak thawn dil a sile  an mai hrangah a tha lo. Curuangah rualpi pakhat hnen ta ka cawi ih hitawk ah ka ra. Ka tupa tla zirnak na ngah ko ding.

          Ka lo sim ding. Tuisan ih fa le tam sawn cu nauhak lai caan lawngah nu le pa an duh, an tih. Paisa an hawl thei hnu cun nu le pa kha an upat duh nawn lo.

          Inn ah paisa cu an mah pawl lawngin an kai. Ka din hmun in pakhat khat hman a tul a sile an hnen ihsin mithmai naunak thawn ka dil theu. Inn khal ah mi hlei pakhat vekin in ruat. An nauhak laiih ka pek mi duhdawt nak pawl in pe sal duh nawn lo.

          Ka tu pa khal cuvek fa le pawl ah tel pang hlah aw” tin sim phah in a mai caan a kim ih siikhaan sungah a lut.

          Keikhal ka rualpa thawn siikhaan ihsin kan tlung. A maizarh ah ka rualpa cu hmuhsal ding an ti caan a kim ruangah zarhkhat a kim ah siikhaan kan ra sal.

          Neta cu a mah thawn kan tongawk nawn lo. Zarhthum hrawng a rei tikah ka rualpa in thuhai pakhat in ra sim. Khi veikhat ah siikhaan ih na kom mi putar pa kha na mang lai maw? Aw… Ziangah. U Khaw Sua male. Ziangah saw”

          Kha putar pakhat mizaan ah a thi an ti. Thinlung thahri pit ih an ti.

          Phundang pi ka ruat. A mithmaikha ka vun mitthlam ngah. A thlarau kumkhua nunnuam nak ngah hram seh tin thla ka cam sak.

          A ngaingai ahcun kan nih fa le pawl cu fimthiam nak malte kan thiam, thil phunkim tuah thei thlang tikah cun nu le pa kha kan ngaih sak duh nawn lo. Nu le pai tuah mi tinkim, tongmi tinkim cu san a nei nawn lo, a hla lai tuk tin kan ruah theu.

          Mah rori nu le pa dinhmun kan thleng lawngah nu le pai duhdawt nak, thlasuah pawl kan thei thiam sal. Cui caan a thleng lawngah nu le pa dinhmun kha kan theithiam.

          Mihrek cun mah rori kha nu le pai dinhmun kan thleng hmanah nu le pai parah zawnruah nak le theihthiam nak a nei lo tu fa le pawl an um lai.

          Riahsiat za cu kan theih thiam hnu cun a tlai tuk zo.

          Curuangah sirawk hlan te ah theihthiam nak neih ding nu le pai dinhmun kha theih thiam sak cio uh si.