Veikhat laiah ni a sa zet mi nikhat ah Tlangak pakhat cu ti a hal tuk ruangah van ah a zam ih ti hawl in a suak. Hmunrawl pi tluan ah cawl lo in a hawl rero nan tidai for khat hman a hmu lo. A rei tikah Tlangak khal ti a hal tuk thawn, a bang tuk thawn a tha a cem thlang. A ruahsan nak pawl a cem zik zawngah Tlangak cu thingkung hnuai ah kitli (KhayaOo) pakhat a vun hmu.
Ti a hal zet mi Tlangak cu a lung a awi zet. Cutikah Kitli a umnak thingkung hnuaiah zamrang ten a tum. Cui caan ah ti a hal mi Tlangak hrangah vanthat nak le vansiat nak cu a tong tlang. A van that nak cu Ketli (KhayaOo) sungah a tang mi tidai malte a um, vansiat nak cu Ketli cu a ka a fiah tuk ruangah Tlangak ziang ti ih a zuam a si khalle ketli sungih um mi Tidai kha in a theih lo.
Aka a fiak mi Ketli sungah cun Tlangak cu a lu a hlroh ih Tidai in ngah dingah a zuam rero nan a zuam nak cu a tha hnem lo. Cutin a beidong in a um rero mi Tlangak cu a mit in lungto pakhat kha a hmu ih ruah nak pakhat a ngah. Lungto te cu a ka in a keu ih Kitli sungah a thlakih Ketli sungih um ti dai cu mal te a par ah a kai. Lungto pakhat in pahnih, pahnih, pathum tin lungto tampi cu Ketli sungah a thlak tik caan ah ti pawl cu a leng tiang a liam. Netabik ah cun Tlangak cu a hal zet mi ti kha a in ngah.
Hi thuanthu cu a felfai zet. A felfai vekin ruah thiam a sile kan hmuh ton mi nunram hrangah that hnem nak tla a um thei. Ti hal rero mi Tlangak cu hmunrawn pi tluanih Tidai a hawl vekin kan mah pawl khal nunram lamtluan ah covo pawl kan hawl rero.
Tlangak cu Tidai kha ol ten hawlih hmuh a ol lo vekin kan mah pawl kha covo pawl thil tithei nak pawl kha ol ten kan hawl hmu thei lo ding a si.
Ralrin ding pakhat ah thil ti suakthei nak ti mi cu hngak men rero ding hnakin mah rori bang in hawl rero lawngah hmuh a theih ti mi a si.
Tlangak cu bang nak tuar in Kitli kha a hmuh tikah Kitli sungah ti a um nacingin ol ten a in thei lo. Kan nunram khal ah bang zet in harsat nak pawl lakah thil ti thiam nak pawl kan hawl hmuh thei a si khal le banhla hawng kheh in ei vek in a ol lo. Kitli sungih ti a um vekin thilti theinak pawl karlak ah hlawhtlin nak pawl a um. Tlangak in Tidai kha ol ten a in theih lo vekin hlawhtlin nak khal ol ten ngah a theih lo.
Kan mah pawl in hlawhtlin kan duh a si le bangnak tuar thei a tul. Tha suah thei a tul.
Culawngsilo in thin beidongin kan dungtun ding a si khal le hlawhtlin nak ihsin kan tla leh thei.
Nunram ah harsat nak pawl ton tinten mai tumtah mi hlawhtlin nak ti mi kha ruahsan mi vekin ti a hal rero mi Tlangak thuanthu kha mang sal in dung sip lo in zuam sin uh si.
