Tisartam pakhat cu rawl a hawl ringring ih rawl a hawl theunak tiva kapih Theikung par ah Zawng pakhat thawn rual pi an rak si. Zawng cu rawl hawl in tivakap ih a ra cawl theu tu Tisartam kha a maium nak theiikung parih Theirah pawl kha Tisartam hrangah a lo ih a toh sak theu. Zawng ih a lawhsak mi Theipi rah pawl cu Tisartam in a zang par ah a ret ih a nupi Tisartam cu a pek theu.
Tisartam pinu cu Theipi rah pawl a ei tinten a vathlum ve… tin a porh ringring theu.
Nikhat ah cu Tisartam pinu cun Tisartam a pa cu a sim. “Na rak keng mi Theipi rah pawl cu an va thlum ve a ti… asinan himi pawl lawng ei cu ka di a riam lo. Theipikung par ih theiirah pawl kha nitin a ei ringring tu Zawng ih lung cu a thlum sawn ding. Theipikung par ih Zawng ih lung ei ngah dingah in rak lak sak aw” tin Zawng sa ei ding ah a ngen.
Tisartam apa cun Zawng thawn rualpi an si ruangah Zawng kha deh ding a duh lo nan Tisartam pinu in tu le tu a dil rero theu ruangah netabik ah cu el ngam lo in Zawngih lung cu ka lo sum ding tin thu a rak tiam. A hlan vek thotho in Tisartam cu rawl a hawl phah ah tivakap ih a cawlh phah ah Zawng kha ziangtin ka bum dingih ka hruai ding ti kha a ruat.
Tisartam cun Zawng cu a biak “Ka rual Zawng… in pek mi Theipi rah pawl a ei ih Tisartam pinu in a lo hmuh duh ruangah inn ah in rak leng seh tin in cah. Curuangah ka zang par ah kai awla inn ah in rak leng aw hen” tin a sut. Zawng cun an rualpi thatawk tuk ruangah a ruah nak sual kha a kai ngah lo ih a sawn sal “Aw.. Tisartam na inn cu tiva lai ah maw. Kei cu ti ka leuh thiam lo ruangah ti sungih tlak ding cu ka tih.” Ruah nak sual a nei tu Tisartam cun “Na thinbang hlah ka rual Zawng ka zang par in in rak thlun aw. Ti sungih na tlak lo nak dingah ka lo kil ding” tin a ti.
A zumtu Zawng cu Tisartam hnen thlun dingah a lung a kim. Cutin Tisartam ih zang par in Zawng cun a thlun ih tiva lai an thleng zik thlang. Zawngcun a zum lemlo ruangah Tisartam apa cu a phunphun in a sut ih tiva lai an thleng zik zawngah Tisartam pa hnen ih thu a sut thei. “A si.. ka rual Zawng, ka nupi Tisartam cu nau a vun ruangah a nih in ka rual Zawng na lung ei duh nak thinlung a pot ruangah ka el ngam lo ruangih ka lo hruai nak a si” tin tiva lai an thleng zawngah a tlan theinawn lo ding ti mi ruah nak thawn ka lo hruainak a si tiah a sim.
Cutikah Zawngcu thu a ruah ih Tisartam kha aipuang zet in a sim sal cih. “Aw.. ka rual Tisartam rualpi ciocio tuan ihsin tuvek in thaten in rak sim le a ngah ko si. Ka lung a ei duh a si le ka lo phur ter ding nan. Tu cu tiva lai thleng lawngah in sim. Theipi kung um nak lam ih kan kir sal a tul. Ka lung cu theipi kung par ah ka rak thlai. Ra aw..tu Theipi kung parih ka lung kan va la sal ding” Zawng ih tong a thei ih a aa mi Tisartam cun “Ngaingai maw, cu ti thei seh la a thok te in ka lo sim ding nan. Tu ziangtin kan tuah ding” tin a sut.
Ruahnak a nei tu zawng cun “Aw… ziangtin saw kan ti ding Theipi kung um nak lam ah kan kir sal ding. Tuanten in sim awla cu ka lung lawnglawng ka lo ken ding nan. Tu cu kan lak sal a tul” Zawngih tong a theih tik ah Tisartam cun Zawng cu Theiipi kung um nak lam ah a feh pi sal.
Zawngcun “Ka rual malte in hngak aw maw, ka lung cu theikung par ka kai dingih ka va la ta dingih ka rak tum sal ding” tin a ti ih Theipikung parah a kai ih a tum nawn lo. Tisartam pa khal theikung hnuai in Zawng cu a hun kawh tikah “Ka rual Zawng na lung na lak theh in ra tum thlang hen” ti a ti tikah Zawng in a sim sal.
“Tisartam hrokhrawl na par ah rualpi tha vekih a rak um tu keivek rualpi hman thinlung sual thawn nangvek rualpi kha ruah nak hmangin ka lo bum. Na dam sung nangvek rualpi sual cu ziangtik hman ah ka lo kom nawn lo ding” tin fiang zet in a sim.
Hi thuanthu in rualpi tha dinhmun in mailam in kan um ko nan mai parih rualpi tha a cang thei lo tu minung khal an um thei ti mi kha zir nak in pe. Leitlun ih kan um tikah minung phunphun thinlung dangdang thawn mitin kha rinhlel nak thawn kom ding a si lo nan mitin khal zingkim mitsing ih zum ding khal a cang thei lo. Thluak thawn tahthim ih zumding timi zir nak in pek a si.
