Veikhatah zaan laiah zawng pakhat cu a leh phah in tikhur te pakhat kiangah a thleng. Tikhur sungih a zoh tikah tikhur sungah thlapi ih a thlam kha a hmu. Cutikah zawng khal mangbang zet in thlapi ti sungah a pil ah a ruat.
Zawng khal zamrang zet in hramlakah a feh ih thlapi ti sungih a pil thu kha a sim ciamco. Cutikah a it rero mi ramsa pawl khal an mangbang in pakhat hnu pakhat an sim aw ih cui thu cu hramlak sung hmuahhmuah ah a thang ih thlapi a um nawn lo a si le zaan ih khua tleu a um nawn lo dingkha a phang tu ramsa pawl an um vekin, hramlak a siat thluh ding, leilungpi a siat ding ti mi thulolak sim tu ramsa hrekkhat pawl ruangah a tih tu khal an rak um. Sai (Vui)pawl khal an hmur thawn tikhur sungih ti kha an zuk ih a leng ah an khai. Ram ui pawl savom pawl khal in tikawng pawl an sial ih zawng rual pawl khal in hridai an hawl.
Zaan ih rawl a hawl theu tu Sumbuh cu rawl a hawl theh ih a tlun ah hramlak a um mi zaten an buai cuaici kha a hmuh tikah a mang a bang zet. Cui pawl cu zaan ih a it tu ramsa pawl an si ti kha a thei. Tu lawngih danglam zetih an zatei an buai ciamco kha zoh in pakhat khat cu a danglam a si fiangfai dingah zinzoi a tul a tiih um nak hmun thawn dingih tin a tuah rero tu sabek te kha a sut.
“Ka rual sabek hramlakah ziangsaw a cang ciamco” cutikah sabek te cun “Hi hramlak pi cu siat lo dingih a kilkhawi tu thlapi tikhur sungah a pil an ti ih. Cu mi a par ih a thlen sal lo a si le hi hramlak pi cu a siat si ko. Hramlak a siah hlan ah thil a tul mi pawl thaten tuah cia aw” a ti. Sumbuh khal ziangthu hman fiangfai zet ih a theih lo ruangah a dang ramsa pakhat ka sut ding tin a ruat ih Ngal kha a sut “Ka rual ngal hramlakah zingsaw cang” tin a sut ih a nih in “khuasia khuavang pawl in hi hramlak hi an la ih hi hramlak cu zaan a si len khua theu a um nawn lo ding. Tikhur sungah cu khuasia khuavang pawl a neh tu cu ti dai ah a pil an ti ruangah mihrek cu an va bawm rero” tin a sim.
Sumbu khal a dik lo mi tong cu a hman mi lamzin in pek thei lo ti a theih ruangah thubuai ih a bulhrampi a si mi hramlakih tikhur cu ka va zoh le a tha ding tin a ruat. Curuangah tikhur lam pan in a feh.
Tikhur a thlen tikah ti pawl a khai rero tu Sai (Vui) kha “Ka rual Sai tikhur ih ti cu ziangruangah na kai rero” tin a sut. Sai khal in “Ka thei lo pi zawngin ti a cem tiang kai aw in ti ruangah ka kai” tin a let.
Zawng a va sut tikah Thlapi tidai ih a pil thu kha Sumbu in a thei. Thuhman a theih tikah Sumbu cu nasa zet in a hni ciamco.
“Rawl ka hawl nak lam tluan ah thlapi cu keimah thawn kan um tlang. Nan nih pawl hi Van teh zoh hnih uh” ti a ti hnu lawngah a dang ramsa pawl khal Van ih thlapi kha an hmu. Culawngah tikhur sungih thlapi cu a thla lo ti an thei fiang.
Thuanthu cu hihmuah in kan cem ter ding. A ngaingai ah cun leitlun ah mitampi cu mah inle hmu lo, ttong lo in midang ih ttong men in lamzin an cem ter theu. Mah in zingzoi in mai thluak ih thuthen ding cu an hngilh theu. hi thuanthu kan siaranak in kan nunram ah lamtha in hruai hram seh.
