RVA Falam Service/ November 5, 2026
Pope Leo XIV cun November ni 4 ni ih Vatican ah mipi thawn tonawknak ah 1965 kum ih suah mi “Gaudium et Spes” timi casung ta ruatbet in, remdaihnak tuah thei ding in Khristian pawl in sumtuahnak (economic) le ramkhel nun lam ah ziang tin kan tel thei timi kha a thupi bik in a sim.
“Pope Francis ih a rak simdah zo vek in, ralbuai ti mi cu ram hotu pawl le minung zate ih sunnak, ningzakza hriamhrei tan ih duainak le thatlonak maksak tak hmaiah thinna zet ih sunnak pakhat a si.”
Pope Leo cun sumtuahnak , miburpi pawlkomawknak nun (social life) le ramuknak hlawmaw tu pawlkom ti mi pawl thu a thupi bik in a zirh. Khristian zumtu pakhat sinak in Catholic ih zumnak langter thei ding ih teltheinak hrang ih bawm tu “ruah theinak tahfung” pawl a pek. Cuitlun ah, mino pawl in “hi mi lam ah rintlak zet in nunnak rak pe tu pawl ih nuncan ziaza pawl thlun ding in le Khristian pakhat sinak in pawlpi ih nunphung zirhnak vek in khal um ding in a forh.
“Technical thansonak lawng in a tawk lo” ti mi cu Gaudium et Spes in ralrinnak a pek. Cu ai ah “minung hrang ih thathnemnak si ringring thei ding in le minung pawl ih uknak hnuaiah um ding in” tin duhsannak a nei mi sumtuah thansonak lam ih “Khristian pawl ih hmuh dan” thu a relh.
“A tu ah a hlan hnak in bawmnak a tul bik tu pawl le mi vai harsa pawl par ih thleidannak thawn komkaih(hmuhsuam deuh ih komkhaihnak) mi hi hrial ding in thukamnak neih ding in,” Pope in a dil.
Pope Leo cun “Hnatuan mi hin milai, mipi hrang thatnak silole sersiam mi pawl siatsuah ding a si lo” tin a ti. A thupi bik mi cu “mi hmuahhmuah in an thiamnak thabik ih an hman thei nak ding ah caan tha pek ding hi a si. Hnatuan nei lo, hmuhsuamnak, harhdamnak lam le hringnun a siatsuah tu hnatuan pawl cu cohlang theih a si lo” tiah a sim.
Hi mi cu Vatican News ihsin an tar mi sung ta lak sin mi a si.
