RVA Falam Service/ October 22, 2026
New York khuapi ih tuah mi UN thawn pehpar in Holy See ih zohfeltu a si mi archbishop Christophe El-Kassis in nuclear hriamhrei pawl hrial in hnong dingah a tul thu thupit in a rak sim. Cu mi cu remdaihnak le ramtin himnak khaisang dingah a thupit thu New York khuapi ih UN thurel nakah a rak sim.
2026 October 19 ni Tlawngkai nikhat ni ah archbishop Christophe El-Kassis in ramtin humhimnak le remdaihnak tamdeuh in hnget ter dingah nuclear hriamhrei hrial nak kha thupit in tuah dingah a sithu a rak sim.
Ramtin humhimnak dinhmun a besiatnak cu nuclear hriamhrei rinsan dingah a si thei lo thu a mah in thupit in a rak sim. Cuidinhmun cu nuclear hriamhrei pawl hrialnak kha tamdeuh in thupit in tuah dingah a tul thu a langter tin khal a rak sim.
Cui New York khuapi ih tuan mi UN thurelnak ih a vei 81 nak thurelnak a pakhatnak committee ih nuclear hriamhrei thawn pehpar mi thuhla vekin thurelnak puai ah hi ti vekih a simnak a si.
Pope Leo XIV in kan dung naite ah ralrinnak a rak pek vekin “remdaihnak ti mi cu hriamhrei thazaang neihnak an bangawk ruangah a si lo. Remdaihnak kha nitin thurel tlangnak le dingfelnak ihsin din dingah asi” tiah a mah in mangsal in sawhkhih in a rak sim.
“Nuclear hriamhrei pawl um ringring nak cu milai pawlkom hrangah a besia bik mi hrinhronak lakah pakhat a si lai a si” ti khal in a rak sim bet.
Archbishop El-Kassis in leilungpi cu buainak thawn a ton can ah nuclear hriamhrei pawl kha san man dingah remin tuah betnak le tamdingin karhzai ternak pawl an tuah thu nuclear hriamhrei hmang ding thu nasa zet in a sim tu tla an um thu le nuclear dodalnak daan cu ramtin ih humhimnak ti daan pawl ah a thupi mi hmunah pehbet in a um thu sawhkhih in a rak sim.
Hi dinhmun pawl in ramtin humhimnak kha hngehternak hnak in a besia ter thu a rak sim fiang. Cuihleiah paampi a tlun ter thei mi hrinhronak parah bun in remdaihnak kha kilkhawi rero lai dinhmun khal pehbet in a can ter tiah a rak sim.
Nuclear hriamhrei pawl ruangah a cang mi ralpi kha kumrei daih tuah fel thei dingah cun pakhat lawng a si mi ti daan cu cui hriamhrei pawl kha a zaten ih siatternak a sithu bishop in a rak sim. Nuclear hriamhrei pawl ruangah a cang thei mi harsatnak pawl mal ter dingih tuahnak pawl cu a tul ko nan cui tuahnak pawl kha nuclear hriammhrei pawl kha a ai a awh thei lo thu a rak sim. Hi mi thuthawn pehpar in nuclear hriamhrei a nei mi ram zaten nuclear hriamhrei darh lonak lungkimnak ca (Treaty on the Non- Proliferation of Nuclear Weapons-NPT) vekin mai tuahvo pawl kha famkim ten tuan dingah Holy See in a rak forhfial thu thupit in a rak sim. Cu mi ah nuclear hriamhrei siatbal nak hrangah thansonak pawl ngah dingih tuahnak khal a tel .
Cuihleiah nuclear hriamhrei khamnak lungkimnak ca kha Holy See in a rak lungkim thu a sim sal ih cui lungkimnak ca ah tel in lethmat tthu nak a tuah hrih lo mi ram pawl khal tel dingah a rak forhfial. Netabikah Holy See in nuclear phun pawl dodal in khamnak lungkimnak sachuk thuneih theinak nung ding khal ah forhfial in a rak dil thu amah in thupit in a rak sim.
Source- Vatican news
October 21, 2026
