RVA Falam Service/ October 16, 2026
Pope Leo XIV in Baptism sangtu mitin ah Khrih ih ruundamnak Pawlpi ah mah fek pakhat ciar a um thu zumtu pawl hnen ah ralrinnak a rak pe.
Khristian pawl dinhmun in Gospel thuthangtha karzai ter in Pathian ih duhdawtnak kha mi kip hnen thleng ding ah hmunkhat ten tuan tlang ding khal in a rak forhfial.
2026 October 18 ni ih tuah ding mi leitlun mission hnatuannak Zarhpi ni World Mission Sunday tuahding mi kum 100 kim hngilh lonak video ih thucahnak ah Pope in tui kum ih thuluu a si mi ” Khrih ah pumkhat ten Pathian hnatuannak ah lungrual tlang uh si” (One in Christ, United in Mission) ti mi kha langsar in a rak sim.
Pope in 1926 kum Pope Pius XI in leitlun huap mission riantuannk zarhpi ni kha a rak namhnget thok ih sin kan dung a luan cia mi kum 100 sungah Pawlpi ih Mission hnatuannak pawl ihsin ngah mi a par a rah pawl hrangah Pathian hnen a lungawi thu a rak sim.
Cui hleiah leitlun mission hnatuannak Zarhpi ni kha a rak namhnget lai ih tumtah mi pawl khal in mang ter sal.
Cu mi tumtahnak ah Pathian thu karhzainak hnatuan parah theihnak, hmuhnak le ngaihsaknak tangter dingah Gospel thuthangtha karhzainak le mission hnatuannak thawn pehpar mi kawhnak pawl hrang thlacam sak dingah le Pope ih Pontifical Mission Societies kha bawm dingah a si.
Cuihnuah kum 100 sungih Pawlpi ih mission hnatuannak a rak bawm tu zate hnen khal ah a lungawi thu a rak sim.
Tui kum ih thuluu thawn pehpar in Pope Leo XIV in Khrih ih dung thlunnak ah Pawlpi ih lungrualnak hnget khoh sinsin ter ding ih a thupit thu thupi zet in a rak sim.
Ahleice in ruundamnak thuthangtha a si mi karhzai ter dingah mizate ih thinlung khat ten zuamnak cu a thupit thu a rak sim.
Pope in ” kan Pathian cu Thiangthlarau ih bomnak in innsang khat vekin hmun khatah tuan tlang dingah kan mah pawl in ko a si. Cutivekin hmunkip ih minung pawl kha Khrih an zumnak in lung a rual mi thianrual tha ah in cang ter thei a si” tiah a rak sim.
Netabikah Pope in leitlun huap Pathian hnatuan ni ih tuah theu mi ti daan kha pehbet in a kilhim tu pawl le leitlun hmunkip ih Gospel thuthangtha karhzainak thawn pehpar in Pawlpi ih mission hnatuan pawl terhsiang zetin a rak bawm tu zate parah a lungawi thu video ih thu a simnak ah a rak sim.
October 14, 2026
Source- Shalom world news
