Ramdang na thlen tikah na lungthlitum, na tumtahnak hlo ter pang hlah….

Ramdang feh tikah mah pakhat cio ah tumtahnak kan nei thluh cio.

A hrek cu innsungsang hrang paisa hawl ding in an feh.

A hrek cu inn pakhat sak dingah, siipuazii pakhatkhat thawk nak ding hrangah an feh. Mi hrek cu an nunnak kal khat tal a sang deuh ding beisei in ramdang hi an hril.

Asinan…..

Caan a hung rei tikah hnatuan a tam in bang caan a tam deuhdeuh. Zing tuanten tho in hnatuan feh a tul. Hnatuan ban in inn tlung lala. Lakha kan ngah. Innsan man, rawl man, tulhai lei nak ah paisa cu kan pe.

Hmai thla khal cu ti thotho.

Kumkhat hnu khal ah cu ti thotho.

Cutin ziangah ramdang ah ka feh ti kha kan hngilh deuhdeuh. Tumtahnak nei tu si mi in, hnatuan in paisa ngah ding hngak ih nung tu men ah kan rak cang theu.

Curuangh…

Ramdang ih na um lai ah na tumtahnak pawl mang ringring aw. Lakha ngah ni tinten “ Himi paisa in ka tumtahnak ziangtluk a nai ter zo” timi nangmah le nangmah sut aw theu aw.

Thla tin mal te khal siseh na tumtahnak hrang paisa khawl ih ret mi nei ringring aw. Ni khat ah nazi malte tal cu na hmai lam hrangah caan pe in ret aw. Thiamnak pakhatkhat zir aw. Na tuah paih ngaingai mi kha hnatuan ka bang tuk ti’n tansan men hlah.

 Paisa na hawl nakah na tumtahnak na hloter mihi hlawhtling mi a silo. Kan tumtahnak hlo ter lo dingin, kan thlah men lo dingin nitin thil tampi kan tuah ding tinak asilo. Mat tete’n  kan tuah ringring ding hi a thupi mi a si.

Tuini caa hmaikhat na sair thei tla a si thei. Paisa tamdeuh na khawl thei tla a si thei. Tuni na thilzir mi nazii khuai sung na zir thei tla a si thei. Thil tenau te an si. Asinan kum le caan a hung rei tikah kha mi thil tenau pawl in kan nun nak a thleng danglam sak thei.

Ramdang ah ziangtluk na bang ti ka theithiam. Caan hrek khat ah cun kan tumtahnak pawl kan lungthlitum pawl ruat men ding hman in tha khal kan nei lo. Asinan khanah ramdangna thlen nak san kha hngilh aw hlah. Paisa hawl aw. Na sungkua pawl bawm aw. Asinan nangmai hmailam caan hrang khal hngilh hlah.

Ni nikhat ah “Ramdang ah kum tam pi hizat ka tuan zo” ti thei men in a tawk lo.

“khami kum pawl ruangah ka nun a thleng danglam ngaingai” ti’n na ti thei ni thleng dingin zuam aw.

Ramdang na feh hi na san sung hnatuan dingin na feh a silo.

Hnatuan in na tumtah mi nun, na lungthlitum pawl tuahsuak dingin asi. Na tumtahnak na thlen zamrang thei lo  hman ah hlo cu hlo ter hlah aw.

Hnuamhnai hi a poilo.

Lamzin na hloh pang ding mihi a poi bik mi cu a si. 

Crd: original poster