Pope Leo XIV in ralbuainak ih hriamhma pawl cu raldonak hmun hnakin a roh deuh thu ralrinnak pe. (August 21, 2026)
Leitlun hmuntin ih Catholic Pawlpi in Septembet 1, 2026 ni ih tuah ding mi sersiam mi kilhimnak ni hrang thlacam ni( World Day of Prayer for the care of Creation) hrangah timtuahnak caan ah Pope Leo XIV in ralbuainak ih hriamhma pawl cu raldonak hmun pawl lawng silo in hmun tin ah laitek um lo in kau zetin a thlen thu ralrinnak a rak pe.
Pope Leo XIV in ralbuainak cu minung pakhat ciar le nunphung kiangkap lawng a siatsuah lo ih milai sungkua zaten thawn a pehpar awk ih hleiah sersiam mi khuavel le minung pawl ih rualremnak khal a hnaihnok thu a rak sim.
Cuihleiah zumtu pawl dinhmun in leitlunah remdaihnak a um theinak dingah Pathian ih remdaihnak peknak pawl kha cawngin nunpi dingah a rak forhfial. “Hriamhrei pawl aiah remdaihnak kha Pathian in kan mah kha in dam ter theinak dingah le duhdawtnak ih nunphung tuah daan pawl din dingah thazaang in pek” tiah Pope in thla a rak cam.
Tui kum ih sersiam mi pawl kilvennak ni thlacamnak ni ih thu pi cu “Cuticun an ralnam cu leilehnak tuhmui ah an ser dingih an feipi cu thingrah kung thenfainak namte ( fangahnak) ah an tuah ding. Ramkhat le ramkhat an do aw nawn lo dingih, raldo khal an tum nawn lo ding.” (Is 2:4)ti mi Bible catlang kha Pawlpi in a hril a si.
Thlawngkai nili ni ah Holy See Press Office zungih suah mi thuthang ah Pope in remdaihnak din dingah thu ngai thlak in a tul mi thilri pawl cu mi a siatsuah thei mi hriamnaam pawl silo in thu dik, thu hman, thu reltlangnak, tangdornak, thatnak, thutak, lainatnak, khat le khat theih thiam awknak le duhdawtnak pawl an si thu a rak sim. Cu mi pawl cu Khrih ih thuthangtha ih zel mi thinlung pawl in a suak mi a si ih Pathian ih zaangfahnak thawngin thazaang ngah thei mi a si tiah a rak sim.
Cuitlun ah Pope Leo XIV in pehbet in a sim mi cu “Jesuh Khrih ih in hmuh mi nunnak ih Pathian in leilungpi ih a pek thei lo mi remdaihnak kha a pe thei a si. Nan hnenah hnangamnak ka lo tanta. Keimah ih hnangamnak ka lo pek a si. Leilung mi ih pek vekin ka lo pe a si lo. Donhar le vansaang in um hlah uh; nan thin khal phang hlah uh. (Jn 14:27) tiah a rak sim.
Hi remdaihnak cu a lenglam lole camkhat te sung a um mi a silo ih Khrih ih a thleng aw thei lo mi duhdawtnak le minung pakhat ciar ih a ret mi Bawipa ih kilvennak in a rak suak mi remdaihnak a si thu Pope in a rak sim. Cuiremdaihnak cu tuini leilungtlun hmun tamzetah hmuh mi ralbuainak le doawknak pawl ih dinhmun pawl thawn a kaiawk lo tuk thu khal tel ih a rak sim. Hi thuthang cu shalom world news in kan ngan mi asi.
