Pope Leo in St. Peter tualrawn ih ratu pawl hnen ah “Jesuh ih umpinak in ziang tinkim a thleng danglam a si” tin a sim. Pope Leo cun St. Peter tualrawn ih a ratu pawl hnen ah tuini ih kan siar mi (Mt 14:22-33) sung ah Jesuh in ziang tin a sim ti mi “a dungthlun tu pawl in thlisia lak le tidai par ih an feh” thu kha a sim.
‘Tih hlah uh’
A dungthlun tu pawl thindai te ih um thei ding ih a hmuhduhsan mi cun, tihphannak a thlen ter sawn. Culai ah Khrih in: “thazang la uh, kei mah ka si, tih hlah uh!” tin a ti. “Bawipa umpitnak in ziangtinkim a thleng ter a si,” tin Pope Leo in a sim. “Peter hman in a Bawipa pan ding in mal te lai tidai par ah a feh; cui hnu ah a tih ih a pil, cule Jesuh in a run sal.” Curuang ah himi Bible in tih lo ding le Jesuh zoh ringring ding kha a tul zia a lang ter.
Zumnak ih cahnak
Pope Leo cun himi tontehnak in ziangha a lang ter ti a si le “Bawipa cu Pathian ih Fapa taktak a si ti ih a dungthlun tu pawl ih an thinlung sung ihsin an zumnak an phuan mi kha,” a si tin a ti. Cun a dang Mt Gospel khan sung ta la in Jesu in “thungai in ka lo sim, rinhlelhnak um lo ih zumnak nan nei a si ah cun hi tlang hman hi thawn aw, tifinriat sungah dawp aw nan ti le nan ti vek in a cang ding” tiah a ti. Hi mi tontehnak hi a dungthlun tu pawl ih tidaipar ih an ton mi ciah kha a si.
Ziangtik hman ah nang mah le mah niamawk tuk hlah
Pope Leo in mangbangza pahnih sung ihsin zirding mi thu a sim: pakhatnak, “hlawhtlinnak hmuh tik ah hngal lo ding”, ti mi le pahnihnak “harsatnak ton tik ah thin thanau in, hmai nor duh lo ih dungsip duhnak thinlung nei lo ding” ti mi hi an si.
Pope in a sim mi cu “Jesuh in in tansan dah lo, “ziangtinkimah” tangdornak thinlung thawn thlacamnak, sacrament, le a Tongkam kan ngai a si ahcun- leitlun kan khualtlawnnak hrang ih a tul mi daihnak, tleunak le thazang ti pawl kha Bawipa ah kan hmu ding.”
A netnak ah “a zumnak ruang ah mithluahsuah tiih kawh mi a co mi Nu Mary in hitivek lamzin ah rinsaknak thawn Pathian hnenah kan feh theinak ding in in bawm hram seh” tin thlacam.
Hi thuthang cu Vatican news sung ihsin lak mi a si.
