US ram ih um mipa pawl Kaing hmuahhmuah a vei 70 nak pumkhawm thurelnak cu Phoenix, Arizona state ah July 20-23, 2026 tiang an tuah. Hi mi an tuah nak ah Pope Leo in Zumnak tongkam thawn thapek nak caa a kuat. A liamcia mi kum 70 sung ih Pathian hnen ihsin ngah mi laksawng pawl hrang ah lungawinak thu sim phah in le, “thinkhat pumkhat ten le lungawi le dik zet in Khrih kha tettikhan(theihpitu) si ding in” nan umnak hmunkip ah zuam sinsin uh tiah tha a pek.
“Pope Leo in Apostolic Nuncio ih kut in hi pumpe ih Pathian riantuantu mipa pawl kom pawl hnen ih a cakuat mi sung ah hi tin a sim. “Pathian thuthangtha hna tuannak ah nan nunnak ap ih nan hnatuan mi in mipi tam pi thazang a cak ter” tin a sim.
Pope Leo in meeting ih a ratu Kaing aiawh ih hruaitu upa pawl hnen ah hi ti vek ih mai member pawl hruaidingdan bawmthei nak ding hrang ih thurelkhawmnak hmun hawl in nan tuah mi par ah lungawi nak tam pi ka nei tin a ti. Khrih ih nundanzia thlun in a mah hrang nan nunnak nan hlan mi hin mipi hrang ah thazang a cak ter a si.
Pope Leo in, an thutlang pi tar mi ruat in a sim mi cu, “khawtlangnun (community life) cu thianhlimternak hmun le thangpawknak hmun hrampi, theipitnak le tirhthlah hnatuannak ih thazang ngahnak a si” tiah thazang lo pek ka duh tin a sim.
Cun, “ziang tinkim thilri , thlarau lam tonteh mi, tirthlah hnatuan ruahnak pawl le mi tulsam pawl bawmnak lam hnatuan nan tuah mi pawl hmunkhat ten nan hmantlang nak thawng in, a thosal tu Bawipa ih a thup in a um nak kha nan lak ah hmuhter/langter a si,” tin Pope in a sim.
Lunghnonak thinlung thawn, Pope in a sim mi cu, “Hi tivek ih ruahsalnak nan tuah mi hi, relkhawmnak le thlacamnak in nan mah le nan mai Kaing cio ah u le nau sinak kha hngetkhoh zet in um thei ding in ruahnak a lo pek a si. Cule nan hnatuan nak hmun le umnak cio ah lungawi le rualrem te in thutak ih Khrih theipit tu si vivo ding in khal a lo bawm thei a si.”
Netabik ah Pope Leo in hi tonkhawmawknak puai pi ih tel tu pawl le palai pawl thluahsuah pek nak a neih hlan ah Kawhhran ih Nu a si mi duhdawtnak neitu Bawinu Maria ih thlacam sak nak sung ah hi tonkhawmawknak cu a ap sak a si.
Hi thuthang cu Vatican news sung ih sin lak mi a si.
