Kum 2026, October thla ih meeting an tuah ding mi “Amoris Laetitia” ti mi thulu thawn pehpar aw mi capi an suah zo.
Hi capi cu Pope Francis in innsang hrang ih post-synodal a rak tuah ni kum 10 kimnak hmin sin nak a si.
Hi meeting cu Pope Leo XIV ih hruai nak in October 7-14 tiang (Eastern Church) nisuahnak lam ih Catholic hotu pawl le Episcopal Conferences ih hotu pawl hmuahhmuah tel in Vatican ah an tuah ding.
Pope Leo XIV in hi tin a duhnak a sim: a tui santhlengawknak hin innsang pawl par ah ziangtluk in a khuhneh ti mi kha theihpi in, khat le khat thu ngaisak aw in, tui san innsang pawl hnenah Pathian thuthang tha ziang tin kan phuang ding ti mi kha Synodal fehdan vek ten fehpi thei ding le “Amoris Laetitia” caa sung ih sim mi vek thawn feh pi ding. Cule Pawlpi in ziang tivek tiang in cangvainak a nei ti tla kha tha ten ruat in tuah ding si.”
Hi ni ah, innsang tampi hnen ih sin an hmuhton mi an nunram thu pawl sim ve ding in an ra tel ding.
Hi mi meeting ah, leitlun huap bishop pawl zaten tel ding in sawm an si. Bishop pawl khal cu hi meeting ah tha ten pakhat le pakhat ngaisakawknak tumpi thawn an tel ding. Cu tik ah an umnak hmun an kir tik ah, pawlpi lam ihsin innsang nunkhua sak nak lam hi ziang tluk in an thupit pi ti le innsang dinhmun khal Pathian ih kawhnak a si ti thu pawl tla tha ten zohsal in, hmailam thanso nak tam pi an tuahsak sal thei ding.
Hi mi meeting ah, innsang nei tu pawl saduhthah ten an tlanlen thei nak ding hmunkhal remsak cia a si ih hlei ah, pawlpi le an innsungsang karlak ih pehtlaihawk nak thu thawn pehpar aw ih an hmuhton mi pawl khal hmaisongnak um lo ten an rel thei nak ding ah a ngaisak tu ding mifim thiamsang pawl khal kawh sak an si.
Hi mi hrang ah, Episcopal Conferences le Eastern Catholic Churches ih hotu pawl kha a halankhan in an Dioceses sung ih innsang nei pawl thawn thungai thlak in meeting nak rak nei cia ding in ti in kan kawh nak a si.
Hi meeting hi Bishop pawl ih Synod a si lo nan, Pope Leo XIV in Consistory (Bishop Upa)pawl thawn meeting an tuah lai ih a thehnak ih a sim vek in Synod ih umzia lungput pawl hmang in thlacamnak, ngaisakawknak le mah le mah thaten ruahawknak ti mi pawl kha theihter nak ah a si.
Hi meeting ih an tuah ding mi ah thutlang pi pa nga a um. Cu pawl cu:
- Tuisan Innsang pawl: An nunram ih an hmuhton mi , mawinak le harsatnak pawl–tui san Kawhhran ih hnatuan dan le innsang nunram ih an hmuh ton mi pawl kha a san ih pek in a feh maw feh lo ti zoh thiam ding
- Mino pawl le innsang kawhnak thawn pehpar aw mi zohsalnak — mino pawl ih auaw kha ngai sak ding le innsang dinhmun ih thupit zia/manneih zia kha zohthiam ding in bawm nak pek thei ding
- Innsang nun: Kumkhatnak innsang dinhmun; a thupi bik caan—nei aw pek te pawl kaihhruai ding le ngaisak ding
- Harnak toncaan ih nunkhuasak dan: Kaihruai awk dan le bawmnakpek ding thu. Buainak a tong tu innsang pawl thawn fehtlang ding dan thu
- Christian innsang pawl cu kawhhran hnatuan tu pawl an si —innsang(thitawknak)le innsang duhdawtnak cun Pathian hna kan tuanak ah thazang petu pakhat a si tin cohlang thei ding.
Himi thuthang cu Vatican News in kan don mi a si.
